Энэтхэгийн бөхийн холбооны тэргүүн, улс төрч Бриж Пушан Сингхийг шүүх цагдаагаар шалгуулж шийтгэх, холбооны удирдлагыг огцруулах шаардлага тавьж бөхчүүд суулт зарласнаас хойш таван сар гаруйн хугацаа өнгөрчээ. Парламентын гишүүнээр зургаан удаа сонгогдсон Пушан болон түүний намынхан дээрх шаардлагад хариу өгөхгүйгээр өнөөг хүрээд байна.
Пушан нь 2012-2022 оны хооронд эмэгтэй бөхчүүдэд бэлгийн дарамт үзүүлж ирснийг долоон эмэгтэй бөх гэрчилж мэдүүлэг өгсөн аж. Гэвч Пушан засгийн газраас томилогдсон хорооны өмнө тамирчдын өгсөн бүх мэдэгдлийг няцаажээ. Төв засгийн газар уг мэдэгдлийг шалгах хороог байгуулна хэмээн баталгаа гаргасны дараа 2023 оны нэгдүгээр сард эсэргүүцлийн жагсаалыг цуцалсан. Тус хорооны тайланг 2023 оны дөрөвдүгээр сарын 5-нд өргөн барьсан боловч олон нийтэд зарлаагүй байна. Жагсагчид 2023 оны дөрөвдүгээр сарын 23-нд эрх баригчдын идэвхгүй байдал, хороо яллагдагчийг дэмжсэн өрөөсгөл байр суурийг баримталж эсэргүүцлээ үргэлжлүүлжээ.
Эсэргүүцлийн суултанд олимп дэлхийн медальт Бажран Пуниа, Сакши Малик, Винеш Погат зэрэг шилдгүүдээр тэргүүлүүлсэн 30 гаруй бөх оролцож буй. Асуудлыг яаралтай шийдвэрлэхгүй бол Энэтхэгийн бөхчүүд "Ханжоү-2022" Азийн наадамд оролцохгүй гэдгээ ч эрс илэрхийлж байгаа юм.