Дархан-Уул аймгийн "Оюуны ирээдүй" цогцолбор сургуулийн бага ангийн багш Э.Бат-Эрдэнэтэй ярилцлаа.

-Бага боловсролын шинэчилсэн хөтөлбөрийг танай сургууль туршиж байна. Энэ хөтөлбөрийн талаар ямар бодолтой байна вэ?

-Энэ хөтөлбөрийн гол зорилго нь хүүхэд бүрийг хөгжүүлэх юм. Бат Доржтой адил математикийн хичээлдээ сайн биш ч, түүнд хэн нэгнээс илүү чаддаг зүйл байгаа. Түүнийг л нээж илрүүлнэ гэдгээрээ энэ хөтөлбөр өмнөх сургалтын хөтөлбөрөөс өөр. Тухайлбал ёс суртахууны хичээл байна. Энэ хичээлээр дамжуулж хүүхдүүдийн хэл яриа, өөрийгөө илэрхийлэх чадварт маш их өөрчлөлт гарч байна. Манай ангид сурлага тааруу нэг хүү бий. Хааяа нэг юм хэлэх хэрэг гарвал, хүрч ирээд миний чихэнд шивнэж хэлдэг. Бүтэн өгүүлбэр хэлүүлэх гэж бүр ядчихдаг юм. Гэтэл саяхан "Миний найз" гэсэн сэдвийн хүрээнд хичээл орлоо. Тэгээд хэн хамгийн сайн найзынхаа талаар ярих вэ гэсэн чинь, хамгийн түрүүнд би яръя гэж байна. Дуугардаггүй хүүхэд дуугарсан  чинь би бараг цочсон. Тэгсэн нөгөө "дуу нь гардаггүй" хүү маань хаанаас нь тийм чанга дуу гардаг байна гэмээр, их өндөр дуугаар "Багшаа, би нэгдүгээр ангид ороод Цэлмэгтэй суудаг байлаа, гээд хоолой нь зангираад дуугүй болчихлоо. Тэгснээ,,,,,би танд уг нь нэг удаа хэлсэн. Би Цэлмэгтэй л хамт суумаар байна гэж. Тэгсэн чинь та анхаараагүйшдээ. Та тэгээд суудал хуваарилаад Маралтай суулгасанд би гомдож байгаа. Би Цэлмэгтэй цуг суух байсан юм"  гээд л уйлчихсан. Тэгээд би ээж аавд нь хэлсэн чинь "Манай хүү гэртээ ч гэсэн бид нартай  бараг л ярьдаггүй. Үнэхээр тэгж ярьсан гэж үү" гээд л гайхаад байсан. Тэгэхээр энэ хичээл хүүхдүүдэд их нөлөөлж байна гэж би хувьдаа дүгнээд байгаа юм.

-Та тэгээд хүүгийн тэгж зориг гарган хэлсэн хүсэлтийг тэр дор нь биелүүлсэн үү?

-Багшийгаа уучлаарай гэж хэлээд, Цэлмэгтэй нь хамт суулгасан.Тэгсэн чинь нүд нь сэргээд л их сэргэлэн цовоо болоод байгаа. Ер нь энэ хичээлээр дамжуулж хүүхдүүдэд олон зүйлийг сургах боломжтой. Тухайлбал мэндлэх хүндлэх ёсыг ч зааж байна. Манай сургуулийн хүүхдүүд үүдний жижүүрээс эхлээд, захирал багштайгаа мэндэлж сурч байгаа.

-Сургуулийн үйл ажиллагаанд эцэг эхчүүдийн идэвхи, үүрэг оролцоо чухал  байдаг гэж багш нар хэлдэг. Ялангуяа бага ангид сурдаг хүүхэдтэй эцэг эхчүүдийн оролцоог нэмэгдүүлэх тал дээр ямар ажил хийж байна?

-Манай ангийнхны эцэг эхчүүд идэвхтэй. Би ээж, аавуудад нэг л зүйлийг хэлдэг. Мэдээж хүүхэд сурах ёстой зүйлээ суралгүй л яахав. Гэхдээ хүүхэд бүр адилгүй. "Тэдний хүүхэд онц сурч байна, тийм ч мундаг, ийм сайн байна" гэж жиших нь буруу. Хүн өөрийнхөө хэмжээнд л сурна гэж хэлдэг.

-Бага ангийн багшийн ажил нөр их хөдөлмөр шаарддаг. Бага ангийн багшаар ажиллаад хичнээн жил болж байна?

-Энэ мэргэжлээрээ ажиллаад 10 гаруй ажил болж байна. Хүүхдүүдтэй ажиллах надад их сайхан санагддаг.Хүүхдийн сэтгэл гэдэг хамгийн  гэгээхэн, бас хамгийн эмзэг байдаг.Хүүхдүүдтэй бужигнаад заримдаа бүр өвчнөө  ч мартчихсан байдаг. Тэгэхээр энэ хэдтэйгээ уулзахаар,бүхий л сөрөг бодлууд маань сарничихдаг.

-ЕБС 12 жилийн тогтолцоонд шилжээд нэлээд жил өнгөрч байна. Анх зургаан настай сурагчдад хичээл заахад ямар байсан бэ?

-Одоо багшилж байгаа багш нарын дийлэнх нь найман настай сурагчдад хичээл заахаар бэлтгэгдсэн. Тиймээс зөвхөн надад төдийгүй олон багш нарт,зургаан настай хүүхдүүдтэй ажиллах тийм ч амар байгаагүй байх. Долоон настай хүүхэд, зургаан настай хүүхдүүдийн хооронд хүртэл асар их ялгаа байдаг.Зургаан настай хүүхдүүд маш амархан тогтоодог ч яг түүн шигээ амархан мартдаг. Яг л цэцэрлэгийн хүүхэд шиг. Багш нарт сургалт семинар явагдсан ч заавал дадлага хэрэгтэй юм байна гэдгийг өөрийн туршлагаасаа суралцсан. Ядаж л хэдхэн цаг, хэдэн минут ч хамаагүй цэцэрлэгийн хүүхдүүдтэй ажиллах хэрэгтэй.Тэгж байж л би ирэх жил яг ийм л хүүхдүүдэд хичээл заах юм байна гэдэг ойлголттой болно.