Жил бүрийн 2 сарын 14-ны өдрийг Валентины өдөр буюу хайрын өдөр хэмээн дэлхий нийтээрээ тэмдэглэн өнгөрүүлдэг. Энэ өдөр хосууд нэг нэгэндээ хайраа илчлэн бие биенээ баярлуулдаг уламжлалтай. Тэгвэл энэ жилийн Валентины өдрөөр хаана ямар урлагийн тоглолт үзэж болохыг танилцуулж байна.

A Sound хамтлагийн залуус гэгээн хайрын өдөр дурлалт хосууддаа зориулан “Forever 247” тоглолтоо хийх гэж байна.  Энэ үдэш зөвхөн хайр, дурлалын тухай хит дуунууд эгшиглэх бөгөөд “Forever 247” тоглолт ийнхүү дөрөв дэх жилдээ уянгалах гэж байгаа юм.
Тус тоглолт ирэх сарын 14-нд “SS club”-т  19.00 цагт болно. Хосууд хайрын үдэшт 20 мянган төгрөгийн тасалбараа саатах бөгөөд “Forever 247” тасалбар энэ сарын 6-наас эхлэн “Hi-Fi records”-ын салбараар худалдаанд гарах гэнэ.

Нэрт жүжигчин Т.Латиф агсны хүү дуучин Л.Байзда тун удахгүй өөрийнхөө бие даасан "Улаан сарнай" нэртэй амьд хөгжмийн тоглолтыг хийхээр болжээ. Тэрээр урлагт хөл тавьсан 20 жилийнхээ ойд зориулж бүтэн жилийн турш цувралаар нийт дөрвөн тоглолт хийх аж. Хамгийн эхний тоглолт нь энэ сарын 14-ний өдөр буюу гэгээн хайрын баярын өдрөөр тавигдах бол удаах тоглолтоо хавраас хөдөө орон нутгаар хийхээр төлөвлөж байгаа аж. Харин үлдсэн хоёр тоглолтыг нь ирэх намар, өвөл Улаанбаатар хотод хийх ажээ.

Гавьяат жүжигчин Б.Сарантуяа удахгүй болох валентины баярыг тохиолдуулан "Хайрын бэлэг" тоглолтоо хийх гэж байна.

Түүний театрчилсан, амьд тоглолт энэ сарын 14-нд "Marquee 27" клубт 20.00 цагт болно. Энэ удаагийн тоглолт нь залуусын хайр дурлал, үнэнч сэтгэлийг зохиомжит уран сайхны утга найруулгаар харуулсанаараа  онцлогтой болох бөгөөд тоглолтын театрчилсан илэрхийллийг УДЭТ-ын залуу уран бүтээлчид болох жүжигчин Д.Ганцэцэг, Г.Дөлгөөн-Аюуш, Н.Баяржавхлан нар тайзнаа амьдруулах аж.

Мөн тоглолтонд олон авьяаслаг уран бүтээлчид оролцож байгаа бөгөөд  бол амьд хөгжмийн багт “Никитон” хамтлагийн бөмбөрчин Ж.Золбоо, басс гитарчин Б.Буян-Өлзий, даралтат хөгжимчин Ц.Байдраг, гитарчин Т.Мөнх-Оргил, цохивор хөгжимчин Б.Ганхөлөг болон бусад залуу хөгжимчид, дуучин Б.Ядамсүрэн, Э.Болор-Уянга нар багтжээ.

Тоглолтын үеэр “Хамгийн амттай шоколад”-ны дуудлага худалдаа болохоос гадна олон сонирхолтой гэнэтийн бэлгүүд таныг хүлээж байгаа аж. Тасалбарын үнэ 50-80 мянган төгрөг.

16 дах жилдээ уламжлал болгон зохион байгуулж буй хайрын шүлгийн “Цагаан уул” наадам Гэгээн хайрын валентиний өдөр болох ажээ.
Оросын шинжлэх ухааны соёлын төвд зохион байгуулах “Цагаан уул” наадам энэ жил хамрах хүрээгээ тэлсэн байна. Наадмын эхний шалгаруулалт аймаг, аймагтаа болж, эхний гурван байрт шалгарсан найрагч улсын наадамд оролцоно. Залуу уран бүтээлчдийг дэмжих, тэдний уран бүтээлийг үнэлж, нийтийн хүртээл болгох, олон нийтэд сурталчлах зорилготой энэхүү наадам хайрын сэдэвт  шүлэг төдийгүй хайрын тухай дууны үг шалгаруулах,  хайрын тухай богино хэмжээний шүлгэн мессежний уралдаан гэсэн гурван төрлөөр явагдах юм байна.Залуу найрагчдын чансааг шалгасан уг наадамдөнгөрсөн жил Э.Бүжинлхам /МУИС-ийн Нийгмийн шинжлэх  ухааны сургуулийн сэтгүүлчийн гуравдугаар курсын оюутан/ тэргүүлсэн бол, удаах байранд залуу яруу найрагч Н.Минжинсайхан, Э.Энхболд нар шалгарч байсан юм.  Энэ жилийн “Цагаан уул” наадам хоёрдугаар сарын 14-ний өглөөний 09.00 цагт эхлэх ажээ.

Тун удахгүй болох гэгээн хайрын баярын өдөр дуучин Наагий, Ц. Хулан хоёр "I love you" нэртэй амьд тоглолтоороо бэлэг барих гэж байна.