“Токио-2020” зуны олимпын наадам ид дундаа орлоо. Өнөөдөр манай таван тамирчин олимпод өрсөлдөх юм. Баг тамирчид хэдэн цагт өрсөлдөхийг танилцуулж байна. Тэр тусмаа хийн гар бууны 25 метрийн дасгал бол Монголчуудын хамгийн өндөр амжилт үзүүлдэг төрөл билээ. Энэ төрөлдөө гавьяат тамирчин Д.Мөнхбаяр олимпоос хүрэл, О.Гүндэгмаа мөнгөн медаль авсан түүхтэй.
БУУДЛАГА: 08.00 цагт Asaka Shooting Range-д эмэгтэйчүүдийн спорт гар бууны 25 метрийн дасгалын урьдчилсан шат эхэлнэ. Манайхаас О.Гүндэгмаа, Ц.Анударь нар өрсөлдөх юм. Өчигдөр тамирчид тогтоол 30 сум буудсан бол өнөөдөр түргэн 30 сум буудсанаар финалд шалгарах найман тамирчны нэр тодорхой болох юм. Тогтоол буудлагын дараа Ц.Анударь 287 оноотойгоор 29-д, О.Гүндэгмаа 283 оноотойгоор 38-д бичигдэж байгаа билээ. Энэ төрлийн финалын буудлага 13.00 цагт эхэлнэ.
ЖҮДО: Монголын багийн тугч Ө.Дүүрэнбаяр эрэгтэйчүүдийн +100 кг-д хүч сорино. Тэрбээр эхний даваанд Узбекистаны бөх Бекмурод Олтибоевтой барилдах сугалаа татжээ. 25 настай энэ жүдоч тивийн аваргаас хүрэл, Армийн дэлхийн аваргаас мөнгөн медаль хүртсэн амжилттай нэгэн. Тэрбээр өмнө нь 2018 оны Мастерс тэмцээнд манай Ө.Дүүрэнбаярыг ялж байв.
УСАНД СЭЛЭЛТ Токиог зорьсон Монголын сэлэгчид өнөөдөр уралдана. Эрэгтэйчүүдийн 50 метрийн чөлөөт сэлэлтэд М.Дэлгэрхүү хурд сорих бөгөөд уралдаан нь 18.10-аас эхлэх хуваарьтай. Харин эмэгтэйчүүдийн 50 метрийн чөлөөт сэлэлтэд уралдах Б.Энххүслэн 18.32 цагаас гараанд гарах юм.
