Нийслэлд явган хүний зам, талбайг нэмэгдүүлэх ажлын хүрээнд газар чөлөөлөх ажил үргэлжлэн явагдаж байна.

Нийслэлийн Засаг даргын захирамжийн хүрээнд хийгдэж буй энэхүү ажлыг Нийслэлийн Засаг даргын ахлах зөвлөх Д.Мөнх-Эрдэнэ ахалж буй юм. Ажлын хэсгээс хийж буй ажлынхаа явцын талаар хотын даргад өнөөдөр танилцууллаа.

Өнөөдрийн байдлаар Натур худалдааны төвөөс урагшаа явсан зам дагуу таван байршилд, Ерөнхий сайд А.Амарын гудамжинд Туушин зочид буудлын орц, гарцын хэсэг, Тээвэрчдийн гудамжинд таван ААН, байгууллагын хашаа, П.Гэндэнгийн гудамжинд 2 ААН, байгууллагын хашаа зэрэг 11 байршилд нийт 22 хашаа, өргөтгөл, орц гарц, явган шатыг буулгаж, газрын чөлөөлжээ. Мөн иргэдээс цахим хуудсаар дамжуулан ирүүлж буй мэдээллийн дагуу судалгаа хийсний дагуу нийт 15 байршилд газар чөлөөлөлт хийхээр болсон байна.

“Улаанбаатар зам засвар, арчлалтын газар” ОНӨААТҮГ-аас энэ онд хийж, гүйцэтгэсэн явган замын ажлуудаа танилцуулав. УБЗЗАГ-аас нийт 7135 ам метр талбайд явган зам тавьсан байна. Гадна тойруугийн дөрөвдүгээр хэсгийн Дарь-Эхээс Ганц худаг-Цагаан даваа чиглэлийн 2.89 км авто замын ажлын хүрээнд 2.89 км явган хүний зам, Махатма Гандийн гудамжийг нарны замтай холбосон түр замын ажлын хүрээнд 420 метр, Сэлбэ гол дээгүүрх түр гүүрийн ажлын хүрээнд 100 метр, Натур худалдааны төв орчимд 54 метр зэрэг хэд хэдэн газарт явган хүний зам тавьсан байна.

Б.Лхам