АНУ-д өчигдөр орой өндөрлөсөн завсрын сонгуулийн дараа Ардчилсан намын нэр дэвшигчид Төлөөлөгчдийн танхимын хэд хэдэн тойрогт дараалан ялалт байгуулж, Бүгд найрамдах намынхан сонгуулийн ялагдлынхаа шалтгааныг дотроо хэлэлцэж эхэлжээ.

Сонгуулийн урьдчилсан дүнгээр Ардчилсан нам Конгрессын хоёр танхим болох Төлөөлөгчдийн танхим болон Сенатад олонх болж, Ерөнхийлөгч Дональд Трампын намын Конгресс дахь хяналт дуусгавар болж байна. Төлөөлөгчдийн танхимын хувьд Ардчилсан намынхан 240-өөс дээш суудал авах төлөвтэй байгаа бөгөөд зарим тойрогт саналын тооллого үргэлжилж байна.

Ардчилсан намынхан өмнө нь Бүгд найрамдах намын найдвартай түшиц гэж тооцогдож байсан хэд хэдэн тойрогт ялалт байгуулсан юм. Тухайлбал, Нью-Йоркийн гуравдугаар тойрогт Том Суози, Калифорнийн 13 дугаар тойрогт Адам Грей, Нью-Йоркийн дөрөвдүгээр тойрогт Лаура Гиллен нар улиран сонгогдсон байна. Мөн Техасын есдүгээр тойрогт Ардчилсан намын Летисиа Гутьеррес ялалт байгуулжээ.

Харин Бүгд найрамдах намынхан ялагдлынхаа шалтгааныг өөр өөрөөр тайлбарлаж эхэлсэн байна. Ерөнхийлөгч Дональд Трамп Ирантай хийж буй дайн сонгуулийн үр дүнд нөлөөлсөн гэдэгтэй санал нийлж, намынх нь ялагдалд уг нөхцөл байдал тодорхой хэмжээгээр нөлөөлснийг хүлээн зөвшөөрчээ. Дэд ерөнхийлөгч Жей Ди Вэнс ч дайныг ялагдлын нэг шалтгаан хэмээн нэрлэсэн байна.

Мөн Бүгд найрамдах намын сенатор Том Тиллис сүүлийн 18 сарын хугацаанд хэрэгжүүлсэн бодлогууд сайн санаатай байсан ч хэрэгжилт нь хангалтгүй байсныг шүүмжилжээ. Сенатор Жон Корнин нам нь улс төрийн эвсэл, дэмжигчдийн хүрээгээ тэлэх үндсэн зарчмаа мартсан гэж үзсэн байна.

Ардчилсан намын удирдагч Хаким Жеффрис ирэх нэгдүгээр сард Төлөөлөгчдийн танхимын дарга болох боломжтой байгаа юм. Ингэснээр Трампын засаг захиргааны үлдсэн хоёр жилийн хугацаанд Конгрессын хяналт, улс төрийн харилцаанд томоохон өөрчлөлт гарах төлөвтэй байна.

Л.Баяр