Мэргэжлийн хяналтын ерөнхий газрын 2014 оны хяналт шалгалтын төлөвлөгөө болон МХЕГ-ын даргын баталсан 01/11 дүгээр удирдамжийн дагуу нийслэлийн Баянзүрх дүүргийн 12 дугаар хороонд байрлах Амгалан дахь Оргил худалдааны төвийн үйл ажиллагаанд хяналт шалгалтыг хийж, өнөөдөр байгууллагын сургалтыг тус төвийн 32 хүний бүрэлдэхүүнтэй зохион байгуулж байна. Энэхүү сургалт нь Хүнсний тухай, Хүнсний бүтээгдэхүүний аюулгүй байдлыг хангах тухай хууль шинэчилсэн болон шинээр батлагдсантай холбогдуулан хүнсний чиглэлийн үйл ажиллагаа эрхлэгчдэд холбогдох хууль, дүрэм, журам, Засгийн газрын 2011 оны 311 дүгээр тогтоолын хэрэгжилтийг хангуулах зорилготой бөгөөд хүнсний үйлчилгээнд дотоод хяналтын тогтолцоог буй болгох, төлөвшүүлэх, дотоод хянан шалгагч нарын чадавхийг сайжруулах, хүнсний түүхий эд бүтээгдэхүүнд чанар, эрүүл ахуй, аюулгүй байдлыг хангуулахад дэмжлэг үзүүлэхэд чиглэгдэж байна. Худалдааны газарт дотоодын хяналтыг хэрэгжүүлснээр: Хүнсний эрүүл ахуй, ариун цэврийн шаардлагыг хангаагүй, хүний эрүүл мэндэд сөрөг нөлөө үзүүлсэн болон үзүүлж болзошгүй, буруу шошголсон, хуурамч түүхий эд, бүтээгдэхүүнийг зах зээлд нийлүүлэхээс хэрэглэгчдийг хамгаалж чадна гэж үзэж байна.