Хог хаягдлыг ангилан, ил задгай хаяхгүй байлгахаар зориулалтын уутыг нийслэлийн есөн дүүргийн айл өрх, албан байгууллагуудад тараасан. Нэг сард 15 ширхгийг үнэ төлбөргүй олгох  хогны уутны зардлыг  хог хаягдлын үйлчилгээний хөлс болох 2500 төгрөгийн төлбөрт багтаан тооцож байгаа юм.

Уут нь ногоон өнгөтэй, , 80*45см-ийн хэмжээтэй, нүүрэн талдаа “Хоггүй Улаанбаатар-Азийн цагаан дагина”, “Хогоо бүү ил хаяарай”, “Хогоо зориулалтын уутанд хийж хуваарьт газраа байрлуулна уу” гэсэн бичигтэй. Ийм уутанд хогоо хийж ачуулаагүй тохиолдолд хогийг нь авахгүй гэж байгаа. Тэгвэл эл хогны уутыг бизнес болгон ашиглаж байгаа иргэд олширсоор байгаа юм. Учир нь зарим иргэд улсаас үнэгүй тарааж байгаа хогны уутыг зах, дэлгүүрүүдээр явж борлуулж байгааг иргэд хэлж байна. Мөн амины орон сууцны айлуудаар уут төдийлөн тараагдахгүй байгаа талаар ч иргэд гомдоллож байгаа юм.

Тэгвэл энэ асуудлуудын хүрээнд Нийслэлийн тохижилт, хог хаягдлын удирдлагын хэлтсийн мэргэжилтэн С.Аригүнээс зарим зүйлийг тодрууллаа.

-Хогны уут тараах ажил хэр хүртээмжтэй явагдаж байгаа вэ. Зарим айл одоо хүртэл нэг ч хогны уут аваагүй гэж байна?

-Бүх айлуудад тарааж байгаа. Өнгөрсөн оны аравдугаар сарын нэгний өдрөөс эхэлж тарааж эхэлсэн. Хогны уут авч чадахгүй байгаа нь зарим хороод, СӨХ-үүд ажлын байран дээрээс ирж ав гэсэн зохион байгуулалтад орсонтой холбоотой. Тэгээд ийм зохион байгуулалтад орсон хэрнээ хогны уутаа ирж ав гэсэн мэдээллийн хорооныхоо иргэдэд өгөхгүй, мэдээлэл хүртээмжгүй байгаагаас ийм байдал үүсч байгаа. Энэ байдалд манайхаас анхаарч, дүүрэг хороодод чиглэл өгч ажиллаж байна.

-Тэгвэл зарим иргэд авсан хогны уутаа зарж байна гэсэн мэдээлэл байна?

-Ийм зүйл байх боломжгүй л дээ. Үнэгүй тарааж байгаа шүү дээ. Зарж байгаа нь хэрэгцээгүй гээд, авч байгаа нь өөр ямар нэг зүйлд ашиглахаар авч байж болох юм. Тэр уут гаднаа хог хаягдалт зориулагдсан гэсэн хаяг шошготой байгаа. Тиймээс үнэгүй хогны уутыг худалдаж авах тохиолдол гарахгүй байх гэж бодож байна. Сар бүр нэг айлд 15 уут үнэгүй өгсөөр байтал зарж байна гэдэг хувь хүний ухамсрын асуудал байх л даа.