Даваа гарагт Францын нийслэл Парис хотноо болсон ёслолын үеэр Лионел Месси тухайн жилийн шилдэг хөлбөмбөгчинд олгодог "Ballon d'Or 2023"-ын эзнээр тодорсон нь найм дахь удаагаа энэхүү нэр хүндтэй шагналыг хүртэж явдал болов.
Тэрбээр тайзан дээр найм дахь "Ballon d'Or"-оо барин “Шигшээ багийн хамт олонтойгоо энэ амжилтаа хуваалцмаар байна. Бас маш их баярлалаа гэж хэлье. Бүх баг, дасгалжуулагчийн баг, амжилтад хүрэхэд минь тусалсан бүх хүмүүстээ талархаж байна. Би энэ шагналыг дахин нэг удаа барьж, энэ мөчийг дахин нэг удаа таашааж байгаадаа маш их баяртай байна. Дэлхийн аварга болсондоо баяртай байгаа. Бас эцэст нь Диего Марадонад төрсөн өдрийн мэнд хүргэе" хэмээв.
Өчигдөр буюу 10 дугаар сарын 30-нд Аргентины домогт тоглогч Диего Марадонагийн төрсөн өдөр тохиосон билээ.
Одоогоор АНУ-ын дээд лигийн Интер Маиами багт хүчин зүтгэж байгаа тэрбээр замналынхаа ихэнх хугацааг Испанийн алдарт Барсалона багт тоглож өнгөрөөсөн.
Л.Сайнаа
