Европын Аваргуудын лигийн хэсгийн шатны гуравдугаар тойргийн тоглолтууд явагдлаа. Аваргын цомыг хамгаалж буй "Манчестер Сити" клуб Швейцарийн аварга "Янг Бойс"-ийн талбайд зочлон тоглож, 3:1-ээр хожив. Эл тоглолтод хоёр гоол оруулсан Эрлинг Хааланд Аваргуудын лигийн бүх цаг үеийн мэргэн буучдын 20-р байр руу урагшиллаа.

Тэрбээр өнөө жил ердөө 23 настай. Хааланд Аваргуудын лигт гурван клубийн бүрэлдэхүүнд тоглож, 33 тоглолтод оролцохдоо 37 гоолыг оруулаад буй юм. Одоо түүний чанх өмнө "Манчестер Сити" клубийн домогт хөлбөмбөгчин Серхио Агуэро 41 гоолтойгоор бичигдэж байна. Хааланд энэ улирлын Аваргуудын лигт 13 гоол нэмж оруулахад, Тьерри Анригийн амжилтыг гүйцэж 8-р байр руу ч ахих боломжтой юм.

"Манчестер Сити"-гийн дасгалжуулагч Пеп Гуардиола "Хааланд бүх насаараа гоол хийх болно. Түүний гоолын магадлал бол карьерийнх нь туршид тасралтгүй үргэлжлэх бодитой аюул" гэсэн юм. Хааланд клубийн түвшин дэх сүүлийн 100 тоглолтодоо 115 гоол (96 гоол оруулж, 19 гоолын дамжуулалт өгсөн)-ыг бүтээжээ.

Пеп Гуардиолагийн удирдлага дахь "Манчестер Сити" клуб Аваргуудын лигт хийсэн сүүлийн 16 тоглолтодоо дараалан хожигдолгүй явна.

Сити 10-р сарын 29-нд Премьер лигийн 10-р тойргийн хүрээнд "Манчестер Юнайтед"-тай хотынхоо дербид тоглох болно.