"Улаанбаатар 2023" жюү жицүгийн Дэлхийн аварга шалгаруулах 20 дахь удаагийн тэмцээний тав дахь өдөр байлдааны самбын бөхийн отгон дэлхийн аварга, холимог тулааны тамирчин Гантөмөрийн Баяндүүрэн 62 кг-ын жинд өрсөлдөв. Дорнод аймгийн харьяат Г.Баяндүүрэн хэдийгээр тэмцээнээ дуусгасан ч 2016 онд “Garuda BJJ & MMA” академид жюү жицүгийн спортоор хичээллэн Дэлхийн тулааны спортын наадмаас хүрэл медаль хүртэж, улсын аваргад гурван удаа түрүүлсэн тамирчин билээ.

Холимог тулаанаар ч давхар хүч үздэг Г.Баяндүүрэн байлдааны самбоор 2017 онд ОХУ-ын Сочи хотод болсон ДАШТ-д 57 кг-д хүрэл медаль хүртэж байсан бөгөөд өнгөрсөн жил Бишкект 58 кг-ын жинд алтан медаль хүртэж Монголын байлдааны самбын түүхэнд гурав дахь дэлхийн аварга болсон юм.