“Apple” компани шинэ загварын iPhone 12 утсаа аравдугаар сарын 13 буюу ирэх мягмар гарагт онлайнаар танилцуулахаар болжээ.
Шинэ загварын iPhone-ийг өндөр хурдны 5G сүлжээнд нийцтэй ажилладаг, iPad Pro төхөөрөмжтэй адил дөрвөлжилсөн хүрээ бүхий хийцтэй, бүх хувилбар нь OLED технологийн дэлгэцтэй гарна гэсэн хүлээлт хэдийнэ үүссэн байна.
Арга хэмжээний урилга дээр “Hi, Speed” гэсэн уриа үг бичсэнээс харвал 5G сүлжээнд ажилладаг. Мөн долгион хэлбэрийн олон цагираг дүрсэлсэн нь iPhone-оос гадна шинэ аудио бүтээгдэхүүнээ танилцуулах нь гэх таамгийг мэргэжилтнүүд дэвшүүлжээ.
“Apple” компани 5.4-6.7 инч хүртэл хэмжээтэй дөрвөн хувилбар бүхий iPhone танилцуулна гэсэн таамаг ч явж байна. Энэ тохиолдолд 6.7 инч нь өмнө байгаагүй хамгийн том хэмжээ юм. “Apple” компани iPhone шинэ бүтээгдэхүүнээ жил бүрийн есдүгээр сард танилцуулдаг уламжлалтай. Харин энэ удаад “Ковид-19” цар тахлын улмаас сар орчмын дараа танилцуулж буй аж.
