Гадаад харилцааны яам, “Дэлхийгээр Аялагчид Ворлд Вандерерс” ХХК нар гадаад улсыг зорьж буй Монгол иргэдэд шаардлагатай мэдээ, мэдээллийг хүргэх, хувийн хариуцлагыг нэмэгдүүлэх, соён гэгээрүүлэх зорилгоор хамтын ажиллагааны санамж бичгийг өнгөрсөн ням гаригт байгууллаа.

Энэ хүрээнд Гадаад хэргийн яамнаас АНУ болон БНСУ-ын Элчин сайдын яамдтай хамтран 2017 оноос эхлэн хэрэгжүүлж буй “Хариуцлагатай аялцгаая” аяны цар хүрээг өргөжүүлэх, гадаадад зорчих иргэдэд албан ёсны мэдээ, мэдээлэл, зөвлөмжийг түгээх, “Үүргэвчтэй аялал-2” нэвтрүүлгийг бэлтгэхэд дэмжлэг үзүүлэх зэргээр хамтран ажиллах аж.

Олон нийтийн сүлжээнд идэвхтэй үйл ажиллагаа явуулдаг, 500 гаруй мянган дагагч гишүүдтэй “Дэлхийгээр аялагчид ворлд вандерерс” групптэй ийнхүү хамтран ажилласнаар Монгол Улсын иргэдийн гадаадад зорчих нөхцөлийг сайжруулах, иргэдийн хувийн хариуцлагыг нэмэгдүүлэх замаар эх орноо гадаадад сурталчлахад томоохон түлхэц үзүүлнэ гэж талууд үзжээ.