Банкнаас бусад санхүүгийн салбарын эрх зүйн орчныг боловсронгуй болгох ажлыг Санхүүгийн зохицуулах хороо Хууль тогтоомжийн тухай хуульд заасан аргачлал, үе шатны дагуу хийж байна. Үүний хүрээнд боловсруулсан Хадгаламж, зээлийн хоршооны тухай хуулийн шинэчилсэн найруулгын төслийг энэ долоо хоногт Азийн хөгжлийн банкны олон улсын зөвлөхүүдийн хамт харилцаа, зохицуулалт бүрээр нь нэг бүрчлэн хэлэлцлээ.
Төслийн хэлэлцүүлгийн үеэр Хорооны дэд дарга Д.Баярсайхан олон улсын зөвлөхүүд болон ажлын хэсгийн гишүүдтэй уулзаж, салбарын эрх зүйн харилцаанд гарч буй хүндрэл бэрхшээл, шийдвэрлэх арга замын талаар ярилцаж, санал солилцлоо. Тэрээр хуулийн шинэчилсэн найруулгын төслийг боловсруулах Ажлын хэсэгт зөвлөмж өгч, оруулж буй нэмэлт, өөрчлөлтүүдийн үндэслэл, баримтлалыг сайтар тооцон, холбогдох хууль тогтоомжтой зөрчилдүүлэхгүй байх, гарах үр дүн, нөлөөллийг урьдчилан харж ажиллахыг чиглэл болголоо.
Ажлын хэсэгт Хорооны Хадгаламж, зээлийн хоршооны газар, Хууль, эрх зүйн хэлтсийн мэргэжилтнүүдээс гадна Монголын Хадгаламж, зээлийн хоршоодын үндэсний холбоо (МХЗХҮХ)-ны төлөөлөл ажиллаж, төсөл, түүний үзэл баримтлал, танилцуулгыг боловсруулан, хүчин төгөлдөр үйлчилж байгаа хуулийн хэрэгжилтийн үр дагаварыг тандан судлаад байна. Мөн зах зээлийн оролцогчид, иргэд, олон нийтээс санал авах ажлыг тодорхой хугацаанд явуулсан бөгөөд дараагийн үе шатанд төслийн үр нөлөөний үнэлгээ, зардлын тооцоолол хийхээс гадна хамааралтай этгээдүүд болон холбогдох бүлгүүдээр шат дараатай хэлэлцүүлэх юм.
