Монгол Улсын гавьяат тамирчин, сонирхогчдын боксын олимп, ДАШТ-ий мөнгөн медальт Н.Төгсцогтын мэргэжлийн боксын ринг дээрх 10 дахь тулаан энэ сарын 26-нд болно.
Түүний энэ удаагийн өрсөлдөгчөөр Колумба улсын боксчин Оскар Эскандон тодорсон билээ. Н.Төгсцогт 2014 онд Инчеоны Азийн 17 дугаар наадмын дараа мэргэжлийн бокст шилжиж, промоутер Аль Хэймоны удирдлага дор хичээллэж байгаа бөгөөд дасгалжуулагч нь Жо Гуссен юм.
Тэрбээр 2015 оноос хойш есөн тулаан хийж, хамгийн сүүлд Филиппиний Хармонито Де Ла Торрег оноогоор ялсан. Харин өмнөх найман өрсөлдөгчөө бүгдийг нь хүнд цохилтоор ялсан билээ.
Түүний 10 дахь өрсөлдөгч О.Эскандон 2014 онд WBO- гийн хагас хөнгөн жингийн дэлхийн аварга цолыг хүртэж байсан тулаанч бөгөөд мэргэжлийн бокс рингэнд 28 тулаан хийж, 25 удаа ялалт байгуулж, гурван удаа ялагдсан байна.
