NBA-гийн плей-оффын хоёрдугаар шатны эхний цуврал өндөрлөлөө. Дөнгөж сая Л.Жэймс тэргүүтэй Морьтон цэргүүд бүсийнхээ тэргүүн баг Торонтог 128-93 харьцаагаар буулган авсанаар цуврал тоглолтыг өндөрлүүллээ. Кливлэнд Торонтод ганц ч хожил өгсөнгүй, өчиггүй буулган авсан бөгөөд Л.Жэймс ямар тоглогч вэ гэдгээ хангалттай харуулав.
Өнөөдөр Л.Жэймс 29 оноо, 8 самбар, 11 дамжуулалт, 2 бөмбөг таслалт, 1 хаалт хийн багтаа томоохон бэлэг барив. К.Лав мөн сайн тоглолт үзүүлж 23 оноо, К.Корвер 16 оноо, Ж.Р.Смит 15 оноо, Ж.Хилл 12 оноо авчээ. Мөн сэлгээний 5 тоглогч 33 оноогоор багтаа тусалжээ.
Торонтогоос К.Лаури, Д.ДеРозан нар муу тоглосоноор багтаа хожил авчирч чадсангүй. Ж.Валанчюнас 18 оноогоор багаа тэргүүлсэн байна.
Кливлэнд Кавальерс бүсийнхээ финалд Бостон-Филадельфигийн аль хожсонтой тоглох бөгөөд Бостон цувралыг 3-1 харьцаагаар тэргүүлж байна.
