Малайзын нийслэл Куала Лумпур хотод 2016 онд зохион байгуулагдсан “Rog masters” кибер спортын олон улсын тэмцээнд CS:GO төрөлд аваргалсан “The Mongolz” баг халаа сэлгээ хийсний улмаас өнгөрсөн онд төдийлөн амжилт гаргаагүй. И-спортын төрөлд Монгол Улсынхаа нэрийг олон улсад гаргадаг тус баг шинэ бүрэлдэхүүнээрээ Ази болон далайн орнуудын аварга шалгаруулах тэмцээнд оролцох эрхээ авчээ.

Тодруулбал, тус тэмцээний эрх олгох сонгон шалгаруулалт өнгөрсөн сард болсон. Энэ үеэр Монголын “The МоngolZ” болон БНСУ-ын “MVP.PK" баг тус бүр хоёр ялалт байгуулснаар энэ сарын 20-22-нд Австралийн Сидней хотод болох "ESL Proleague" Ази болон далайн орнуудын аварга шалгаруулах тэмцээнд өрсөлдөх эрхтэй болжээ.

Тэд эл тэмцээнд түрүүлвэл “ESL Proleague” тэмцээний эцсийн шатанд шалгарч дэлхийн аваргын төлөөх тоглолтод оролцох эрхээ авна.