Лос Анжелес Клипперс баг сүүлийн 9 тоглолтондоо хожигдоод байгаа билээ. Тэгвэл тэдний хожигдлын цуврал цаашдаа ч үргэлжилж магадгүй болоод байна. Учир нь багийн түлхүүр тоглогчдын нэг Патрик Бэвэрли өвдгөндөө мэс засал хийлгэж энэ улирлыг өнжихөөр болсон байна.
Бэвэрли 11 – р сарын 10 – аас 11 – р сарын 18 хүртэлх хугацаанд өвдөгний бэртлийн улмаас таван тоглолтыг өнжөөд байсан. Улмаар баруун өвдгөндөө зайлшгүй мэс засал хийлгэх шаардлагатай болжээ.
Патрик Бэвэрлигийн хувьд өнгөрсөн зун Крис Полын солилцоогоор Клипперс багт ирж байсан юм. Клипперс баг улирлыг 4 хожлоор эхэлсэн ч түүнээс хойш хийсэн 12 тоглолтоос ердөө ганц хожил авсан билээ.
Клипперсийн өөр нэг холбон тоглогч болох Теодосич мөн бэртэлтэй байгаа. Тиймээс Остин Риверс, драфтын хоёр дугаар тойргийн сонголт Яавун Эванс нарын талбай дээр гүйцэтгэх үүрэг ихсэхээр болж байна.
