Францын хамгийн нэр нөлөө бүхий телевизүүдийн нэг TV5 Monde-г Оросоос хакердсан хэмээн үзэж байгаа тухай “BBC” агентлаг мэдээллээ.

Өнгөрсөн дөрөвдүгээр сард телевизийн сошиал хаягууд дээр алан хядагч “Исламын улс” бүлэглэлийнхэнд хамаарахуйц бичлэгүүд цацагдсан юм. Энэхүү хэргийг тухайн үед Сири, Иракын нутагт ноёрхлоо тогтоосон “Исламын улс” үйлдлээ хэмээн мэдээлж байсан.  

Гэвч энэхүү хэргийг шалгаж буй Цагдаагийн газрын зүгээс хакерчид ОХУ-аас нэвтэрсэн гэх мэдээллийг өглөө. Францын хэвлэлүүдээр Оросын APT28 нэртэй хакерчид халдсан байж магадгүй хэмээн үзэж байгаа гэжээ. Тиймээс тус бүлэглэлд анхааран мөрдөж эхэлсэн байна.

Францын телевизээс өмнө АНУ-ын Цагаан ордон, НАТО-гийн компьютерийн сүлжээнд нэвтэрсэн ноцтой кибер гэмт хэргүүд гарсан. Тиймээс энэ удаагийн халдлага Оросоос нэвтэрсэн болох нь тогтоогдвол барууныхан томоохон байгууллагуудын кибер халдлагад москваг сэжиглэх нь ойлгомжтой хэмээн ажиглагчид үзэж байна.

Г.Үжин