Байгаль орчин Хүнс хөдөө аж ахуйн байнгын хороо Төсвийн байнгын хороотой хамтран өнөөдөр хуралдлаа. Гаалийн албан татвараас чөлөөлөх тухай, НӨАТ-с чөлөөлөх тухай хуулийн төслүүдийг энэ үеэр хэлэлцсэн юм. Өөрөөр хэлбэл 100 мянган тонн улаан буудайг импортоор оруулж ирэхдээ гааль болон НӨАТ-с чөлөөлөх тухай асуудал юм. Хуралдаанаар энэ асуудлыг УИХ-ын чуулганаар эцсийн хэлэлцүүлэгт бэлдүүлэхээр боллоо.
Татвараас чөлөөлөх хуулийн төслүүдийг дагалдаж орж ирсэн газар тариалангийн үйлдвэрлэлийн тогтвортой хөгжлийг хангах тухай УИХ-ын тогтоолыг батлах гэж байна. Тогтоолын төслийн гол агуулга нь газар тариалангийн салбарт сэргэлт орж эхэлсэн байдлыг тогтворжуулахад оршино. 2014-2024 он хүртэлх Газар тариалангийн бодлогын хөтөлбөрийг салбарын яамнаас нь оруулж байгаа юм. Харин энэ асуудлыг ирэх хаврын чуулганаар хэлэлцэх төлөвтэй байна.