Төрсөн эцэгтээ заазуурдуулсан 5 настай хүүгийн шүүх хурал  Баянзүрх дүүргийн шүүх дээр эхлэх гэж байна. Түүний эцэг Н.Довжинсүрэнг Эрүүгийн хуулийн 181.3, 100.1-т зааснаар хэрэг үүсгэж шалгасан бөгөөд, түүнд хүүгээ байнга зодсон буюу тарчлаасан, хүйтэн мэс хэрэглэж бусдын биед санаатай хүнд гэмтэл учруулсан хэрэгт буруутган эрүүгийн хэрэг үүсгэн, прокуророос яллажээ. Шүүхээс түүний гэм буруутайг нотолвол 6-10 жилийн хорих ял оноох юм. Хуралд даргалагч шүүгчээр Л.Ганзориг, улсын яллагчаар З.Оюундэлгэр, хохирогчоор таван настай хүү И болон түүний ээж О.Болормаа нар оролцохоор юм. Уг хурал насанд хүрээгүй хүүхдэд холбоотой учраас хаалттай хэлэлцэх юм байна. Дашрамд хэлэхэд, хүүгийн биеийн байдал болоод түүний ар гэр сайн байгаа. Мөн өнгөрсөн 7 хоногт түүний ээж "Жигүүр гранд" группт ажилд орон амьдрал нь урагшилж яваа аж. Харин хоёр настай дүү нь энэ зуны турш хүүхдийн сувилалд эмчлүүлжээ. Ямартаа ч түүнийг эмнэлгээс гарахаар нүдэнд нь сайхан сэтгэлт хүмүүсийн хандиваар мэс засал хийлгэхээр төлөвлөөд байгаа юм байна.