Зун, намрын налгар сайхан өдрүүдэд хурим найр, тэмдэглэлт баяр ёслол их болдог. Яг л энэ үеэр цэцгийн баглаа тэвэрсэн, тасалгааны цэцэг барьсан ганган дэгжин хүмүүс их хотын хаа сайгүй алхаж харагдана. Тэгэхээр зуны аагим халуун өдрүүдэд тасалгааны цэцгийн хэрхэн арчилдаг, мөн хэн нэгэнд цэцэг бэлэглэх гэж буй бол ямар цэцэг бэлэглэх нь  тохиромжтой вэ зэрэг асуултад хариулт болохуйц сонирхолтой зөвлөгөө, мэдээ мэдээллийг хүргэхээр бэлдлээ. Мөн ааштай, уйланхай, унтамхай гээд л янз бүрийн хүүхдийн онцлогт тохирсон цэцгийн тухай дэлгэрэнгүй танилцуулах болно.

Удвал цэцэг нь хөлсөрхөг хүүхдэд тустай: Хар цагаан хэл ам, муу энергитэй хүний атаархлаас болон хүүхдийг хөлсрөхөөс хамгаалдаг гэж үздэг. Ямар нэг хүн гэрт орж ирэхээр шөнөжингөө уйлчихдаг хүүхэд байдаг. Мөн хүүхдээ аваад айлд хонож болдоггүй айлууд олон байдаг. Тэгвэл энэ цэцэг нь хөлсөрхөг хүүхдэд нэн тустай юм. Мөн өрөөний агаарыг гаднаас орж ирэх машины утаанд агуулагдах бензол, трихлорэтанаас цэвэрлэдэг.

Цитрусын төрөл буюу хөдөлгөөн ихтэй хүүхдийг тайвшруулдаг цэцэг: Тасалгааны лимон, жүрж, мандарин нь эфирийн масло агуулдаг тул бактери устгах, тайвшруулах чадвартай. Энэ эмчилгээний увидас нь навч, цэцэг, жимс зэрэг бүх хэсгээс нь ялгардаг. Хөдөлгөөн ихтэй хүүхдийг тайвшруулна, ядаргаа тайлна, уур уцаарыг нь арилгана. Шөнийн айдас болон уйлхаас хамгаална. Харин даралт, тархины цусан хангамжийн өөрчлөлттэй том хүмүүсийн өрөөнд эдгээр модыг тавьж болохгүй.

Шимтэглэй - мэдрэлийн өвчтэй, мэдрэлийн ядаргаатай хүүхдэд сайн. Агаар цэвэршүүлнэ, үнэр нь тайвшруулна мөн Фэнг Шүйн сургаалиар гэрийн муу энергийг өөртөө сорж арилгадаг. Гэвч энэ цэцэг нь маш хүчтэй харшил өдөөгч юм байна. Харшилд өртөмтгий хүүхэдтэй бол дэмий.

Цикламен буюу ааштай хүүхэдтэй айлд байх маш сайн. Хүүхдүүд өөрсдөө тоглоом зохиож, өөрсдийгөө саатуулаад, томчуудтай зууралдаад анхаарал шаардаад байхаа больдог гэнэ. Цикламен нь мөн хүүхдийн урлан бүтээх чадварыг хөгжүүлэхэд нөлөөлдөг. Хамтдаа гэр бүлээрэй юм хийж бүтээдэг айл өрхөд байхад илүү тохирно. Агаарт ялгарах эфирийн масло нь хамгийн ааштай хүүхдийг хүртэл тайвшруулдаг. Мөн юм урлах, бүтээх дур хүсэлтэй болгож, уран сэтгэхүйг хөгжүүлдэг гэнэ. Гэхдээ хүүхдийг хамаагүй цикламен оролдуулж болохгүй. Шүүс нь хортой, гэдэсний хямрал, зөөлөн салстын түлэгдэл зэрэг өвчин илэрдэг.

    Хайтан цэцгийн клубын захирал Г.Батсүхээс цэцгийг хэрхэн арчлах мөн цэцгийн ач тус, утга учрын талаар асууж тодрууллаа.

Зуны дэлгэр цагуудад хурим найр болж, тэмдэглэлт баяр ёслол, хонхы баяр болдог. Тэгвэл сүүлийн үед хүмүүс ер нь хуримын бэлэг төдийгүй томоохон арга хэмжээний үеэр ч тасалгааны цэцгийг бэлгэнд өгдөг болсон юм шиг ?

-Тасалгааны цэцэг бол хуримын хамгийн нандин бэлэг юм. Тасалгааны цэцгийг он удаан жил арчилаад л байвал ургасаар байдаг.  Айлууд болон байгууллагууд тасалгаагаа амьд цэцгээр чимнэ гэдэг хамгийн сайхан зүйл юм. Европчууд цэцгийг аз жаргалын хэмжүүр буюу хамгийн аз жаргалтай айлыг цэцгээр нь жишиж харж байдаг. Хайтан клубын цэцэгчдийн цэцэг бол монгол хөрсөнд ургасан, маш тансаг цэцгүүд байдаг. Тасалгааны цэцэг нь хүүхдийн хүмүүжил мөн экологийн асуудал, утаа униартай тэмцэхэд хэрэгтэй зүйл.  Учир нь хүүхэд багаасаа амьд цэцгийг хайрлаж арчилна гэдэг хүмүүжилтэй, мөн хайрлах нинжин сэтгэлтэй болгож байгаан илэрхийлэл юм.  

-Цэцэг бүр л өөр өөр утгыг илэрхийлж байдаг. Тэгэхээр та хүмүүсийн тэр бүр мэдээд байдаггүй зарим нэг цэцгийн бэлгэдлийг хэлж өгөөч?

-Бэлгэдлийн, хүндэтгэлийн, хайр сэтгэлийн, анагаахын гээд л олон төрлийн цэцэг байдаг. Бүр гүзээлзгэнэ ургасан цэцэг,  Хайтан цэцэг, Бэр цэцэг,  Хүргэн цэцэг гэх мэт сонирхолтой цэцгүүд манай клубид бий.   Энэ дотроос титалчлаад үзвэл  Бэр, Хүргэн цэцгүүд маань сайн хүргэнтэй болох, сайхан бэртэй болохыг бэлэгшээдэг. Мөн Цээнийн цэцгийг охин маань сайн яваасай гэж бэлгэшээж үздэг.  Өөрөөр хэлбэл цэцгийн утга учрыг мэднэ гэдэг бас нэг төрлийн мэдлэгээс гадна өөртэй ямар цэцэг зохицохыг мэдэхэд тустай.  Тиймээс залуу  хосуудад хандаж тасалгааны цэцэг олныг тарьж үр хүүхдүүддээ зөв хүмүүжил олгож, ээжийгээ хайрладаг, эмэгтэй хүнийг хайрладаг тийм хүн болгоход цэцгийн нөлөө маш их шүү гэж хэлмээр байна.

-Цэцэг арчлах талаар та манай уншигчдад зөвлөгөө өгнө үү?

-Цэцэг арчлахдаа хамгийн гол нь усалгааг нь зөв тааруулах хэрэгтэй. Хайрлаж  байгаа нь энэ гээд л их хэмжээгээр үндсийг нь илжиртэл усалсан байдаг. Энэ бол маш буруу. Мөн нарны хэт тусгалаас сэргийлэх хэрэгтэй. Ерөнхийдөө намар хаврын улиралд цэцэг тарих их зүгээр.

- Кактус буюу  өргөст цэцгүүдийг хүмүүс айл гэрт байхад их муу гэж ярьдаг. Бас муу энергитэй цэцэг гэж байх уу?

-Энэ бол хүмүүсийн өрөөсгөл ойлголт. Харин ч өргөстэй цэцэг айлыг муу муухайгаас хамгаалж, хулгай зэлгийгээс сэргийлдэг. Дээрээс нь энэ цэцэг дэлбээлвэл тэр айл баяждаг гэх бэлгэшээл ч байдаг.