Технологийн тэрбумтан Элон Маск энэ зун эхэлснээс хойш Бүгд найрамдах намын бүлгүүд болон өөрийн улс төрийн үйл ажиллагааны хороонд дор хаяж 276 сая ам.долларын санхүүжилт олгосноор 2026 оны завсрын сонгуулийн хамгийн том хандивлагчаар тодроод байна. Маскийн улс төрийн гол байгууллага болох America PAC-ийн төлөөлөгч даваа гарагт энэ мэдээллийг баталжээ. Түүний хандивын талаарх мэдээллийг “The New York Times” сонин анх нийтэлсэн байна.
Энэ удаагийн хандивын дийлэнх буюу 158 сая ам.долларыг Бүгд найрамдах намын сенаторуудын сонгуулийг дэмждэг Senate Leadership Fund байгууллагад өгчээ. Тус байгууллага одоогоор Техас муж дахь Сенатын суудлаа хадгалж үлдэхийн тулд их хэмжээний хөрөнгө зарцуулж байна. Техас муж нь Маскийн бизнесийн ашиг сонирхлын хувьд чухал бүс нутаг юм.
Дэлхийн хамгийн баян хүмүүсийн нэг Элон Маск 2024 оны ерөнхийлөгчийн сонгуулийн үеэр Доналд Трампыг ялалтад хүргэхэд туслах зорилгоор бараг 300 сая ам.доллар хандивлаж байв. Түүний санхүүгийн дэмжлэг нь Ардчилсан намын зүгээс анхаарал хандуулах гол шалтгаануудын нэг болсон юм.
Трамп засгийн эрхэнд гарсны дараа Маск Вашингтонд эргэн ирж, төрийн зардлыг бууруулах зорилготой Засгийн газрын үр ашгийн асуудал хариуцсан байгууллагыг удирдсан. Гэвч 2025 оны тавдугаар сард тэрбээр улс төрийн зардлаа эрс багасгана гэж мэдэгдэж байлаа. Үүний дараа Трампын дотоодын бодлого, татварын тухай хуулийн асуудлаар тэдний харилцаа муудсан ч сүүлийн үед харилцаа нь дахин сайжирсан байна. Өнгөрсөн долоо хоногт Трамп Маскт Үндэсний шинжлэх ухааны медаль гардуулжээ.
Маскийн санхүүгийн дэмжлэг Техас мужийн Сенатын сонгуульд онцгой анхаарал татаж байна. Тус мужийн Бүгд найрамдах намын ерөнхий прокурор Кен Пакстон Ардчилсан намын мужийн төлөөлөгч Жеймс Таларикотой өрсөлдөж байгаа юм. Техас муж 1994 оноос хойш муж даяар зохион байгуулагддаг сонгуульд Ардчилсан намын нэр дэвшигчийг ялуулаагүй байна.
Senate Leadership Fund тус мужийн сонгуулийн өрсөлдөөнд 100 сая ам.доллараас давсан хөрөнгө зарцуулжээ. Харин тус байгууллагын удирдлагууд энэ нь бусад өрсөлдөөнтэй муж дахь сонгуулийн зардлыг бууруулахгүй, тусгайлан бүрдүүлсэн санхүүжилт гэдгийг мэдэгдсэн байна. АНУ-ын холбооны сонгуулийн санхүүжилтийн байгууллагад улс төрийн намууд болон зарим улс төрийн үйл ажиллагааны хороод гуравдугаар улирлын санхүүгийн тайлангаа пүрэв гарагт багтаан өгөх ёстой.
Л.Баяр
