Японы Айчи-Нагоя хотод болж буй 20 дахь удаагийн Азийн наадмын жүдо бөхийн тэмцээн есдүгээр сарын 30-наас аравдугаар сарын 2-ны хооронд зохион байгуулагдаж, Монголын шигшээ багийн тамирчид амжилттай өрсөлдлөө.

Монголын багийн анхны алтан медалийг Ёолк Казирбек эрэгтэйчүүдийн -66 кг-ын жинд хүртсэн. Тэрбээр финалд Узбекистаны Парисын олимпын хүрэл медальт Абдурахим Нутфуллоевыг иппоноор ялж, Монголын энэ наадмын анхны алтан медалийн эзэн болсон юм.

Ингэснээр Ёолк Казирбек Азийн наадмын жүдо бөхийн төрөлд Монгол Улсаас алтан медаль хүртсэн найм дахь жүдоч болсон байна. Түүний хувьд 2025 оны ДАШТ-ээс хүрэл медаль хүртсэн нь олон улсын тавцанд гаргасан томоохон амжилтуудын нэг юм.

Харин эмэгтэйчүүдийн -57 кг-ын жинд Тэрбиш Ариунзаяа мөнгөн медаль хүртэв. Тэрбээр финалд БНСУ-ын Хо Ми-ми-тэй барилдаж, юкогоор ялагдсан ч Азийн наадмын дэвжээнээс мөнгөн медаль хүртсэн байна.

Монголын жүдочдоос таван тамирчин хүрэл медалийн эзэд болжээ. Үүнд:

• Ганбаатар Наранцэцэг – эмэгтэйчүүдийн -48 кг

• Лхагватогоо Энхрийлэн – эмэгтэйчүүдийн -63 кг

• Уран-Үлзий Ануjin – эмэгтэйчүүдийн -70 кг

• Амартайван Адъяасүрэн – эмэгтэйчүүдийн +78 кг

• Батхуяг Гончигсүрэн – эрэгтэйчүүдийн +100 кг

Эдгээр амжилтыг Олон улсын жүдо бөхийн холбооны албан ёсны дүнгээр баталгаажуулсан бөгөөд Монголын баг нийт 1 алт, 1 мөнгө, 5 хүрэл медальтайгаар жүдо бөхийн медалийн чансааны дөрөвдүгээр байрт оржээ.

Мөн Монголын Лхамаа Энхдүл (-73 кг), Баянмөнх Уранзаяа (-52 кг) нар тавдугаар байр эзэлсэн бол Энхтайван Ариунболд (-60 кг), Оюунчимэг Шинэбаяр (-81 кг), Жүгдэргарав Энхтөр (-90 кг) нар долдугаар байрт шалгарсан байна.

Ийнхүү Монголын жүдо бөхийн шигшээ баг Айчи-Нагоя-2026 Азийн наадмыг долоон медальтайгаар өндөрлүүлж, тивийн томоохон тэмцээнүүд дэх амжилтаа ахиуллаа.

Л.Баяр