Туркийн эрх баригчид LGBTQ+ эрхийн байгууллагууд, идэвхтнүүд болон зарим клуб, бааруудад нэгжлэг хийж, олон арван хүнийг баривчилжээ. Энэ ажиллагаа нь тус улсын Засгийн газрын “Миний гэр бүл аюулгүй” хэмээн нэрлэсэн, гэр бүлийн уламжлалт үнэт зүйлсийг хамгаалах зорилготой кампанит ажлын хүрээнд явагдсан байна. Истанбулын Ерөнхий прокурорын газраас мэдээлснээр, өнгөрсөн амралтын өдрүүдэд 12 мужид ажиллагаа явуулж, 38 сэжигтнийг онилсноос 26 хүнийг баривчилжээ. Цагдаа нар нэгжлэгийн үеэр мансууруулах бодис, цахим төхөөрөмж, хууль бусаар оруулж ирсэн согтууруулах ундаа болон галт зэвсэг хураасан байна.

Үүнээс гадна Анкара хотод LGBTQ+ эрхийг хамгаалдаг Kaos GL байгууллагатай холбоотой мөрдөн шалгах ажиллагааны хүрээнд 21 хүнийг баривчилжээ. Харин тус байгууллагын мэдээлснээр нийт 50 орчим идэвхтэн саатуулагдсан бөгөөд тэдний 10 гаруй нь гэрээсээ баривчлагдсан байна.

Туркийн Хууль зүйн сайд Акин Гүрлек мөрдөн шалгах ажиллагаа нийт 15 мужид өрнөж, 162 сэжигтэн, есөн холбоо байгууллага, 13 аж ахуйн нэгжийг хамарч байгааг мэдэгджээ. Эрх баригчид уг ажиллагааг биеэ үнэлэлт, садар самуунтай холбоотой хэрэг болон хүүхэд, залуучуудад сөргөөр нөлөөлөх үйл ажиллагааг таслан зогсоох зорилготой гэж тайлбарласан байна.

Мөн LGBTQ+ байгууллага, идэвхтнүүдтэй холбоотой олон арван цахим хуудас, сошиал медиа хаягт хандах боломжийг хаасан талаар Kaos GL мэдээлжээ. Энэхүү ажиллагаа нь Ерөнхийлөгч Режеп Тайип Эрдоганы Засгийн газар төрөлт буурч, хүн ам хөгширч буй асуудлыг шийдвэрлэх зорилгоор хэрэгжүүлж буй “Гэр бүл ба хүн амын арван жил” хөтөлбөртэй давхцаж байна. Засгийн газар уг бодлогын хүрээнд гэр бүлийн уламжлалт үнэт зүйлсийг хамгаалахыг чухалчилж байгаа юм.

Гэвч хүний эрхийн байгууллагууд болон Европын парламентын зарим төлөөлөгч Туркийн эрх баригчдыг LGBTQ+ иргэдийг ялгаварлан гадуурхаж, иргэний нийгмийн байгууллагуудын үйл ажиллагааг хязгаарлаж байна хэмээн эрс шүүмжилжээ.

Туркийн Хүний эрхийн нийгэмлэг уг ажиллагааг “төрөөс зохион байгуулсан ялгаварлан гадуурхалт, айдас төрүүлэх улс төр” хэмээн тодорхойлсон байна. Харин Европын парламентын Туркийн асуудал хариуцсан илтгэгч Начо Санчес Амор баривчилгааны давалгааг “хэлмэгдүүлэлтийн ноцтой хурцадмал байдал” хэмээн үнэлжээ.

Туркт ижил хүйстний харилцаа өөрөө гэмт хэрэгт тооцогддоггүй ч LGBTQ+ хүмүүсийн эрх, үзэл бодлоо илэрхийлэх боломж болон олон нийтийн арга хэмжээнд оролцох эрх сүүлийн жилүүдэд улам их хязгаарлагдах болсон талаар хүний эрхийн байгууллагууд анхааруулсаар ирсэн байна.

Л.Баяр