Францын парламент 15 хүртэлх насны хүүхдүүдэд нийгмийн сүлжээ ашиглахыг хориглох хуулийн төслийг эцэслэн баталлаа. Ингэснээр Франц улс Европын холбооны хүрээнд хүүхдийн сошиал хэрэглээнд ийм хатуу хязгаарлалт тогтоосон анхны орон болж байна. Шинэ хууль 2026 оны есдүгээр сарын 1-нээс хэрэгжиж эхлэх бөгөөд 15 нас хүрээгүй хүүхдүүд сошиал платформд шинэ аккаунт нээх боломжгүй болно. Харин одоо ашиглаж буй аккаунтуудыг хаахад платформуудад дөрвөн сарын шилжилтийн хугацаа олгож, 2027 оны нэгдүгээр сарын 1-нээс хоригийг бүрэн хэрэгжүүлэхээр төлөвлөжээ.
Хуулийг Сенат 243 гишүүний дэмжлэгтэйгээр баталсан бол Үндэсний ассамблейд 279 гишүүн дэмжиж, 81 гишүүн эсэргүүцсэн байна.
Францын эрх баригчид хүүхдүүдийг цахим дарамт, хортой контент, сошиал сүлжээнд донтох эрсдэл болон сэтгэл зүйн сөрөг нөлөөллөөс хамгаалах шаардлагатай гэж үзэж байна. Шинэ журмын дагуу платформууд хэрэглэгчдийн насыг баталгаажуулах систем нэвтрүүлэх үүрэг хүлээх юм. Гэхдээ энэ нь хувийн мэдээллийн хамгаалалт, нас баталгаажуулах технологийн найдвартай байдалтай холбоотой шинэ маргаан дагуулах төлөвтэй байна.
Боловсрол, шинжлэх ухаан болон нийтийн ашиг сонирхолд үйлчилдэг зарим цахим платформыг хоригт хамруулахгүй байж болох аж. Францын шийдвэр дэлхий даяар хүүхдийн сошиал хэрэглээг хязгаарлах шинэ давалгааг улам хүчтэй болголоо. Австрали 2025 оны арванхоёрдугаар сард 16 хүртэлх насныханд сошиал сүлжээ ашиглахыг хориглосон дэлхийн анхны улс болсон. Харин Их Британи, Индонез зэрэг орон ч мөн өсвөр үеийнхнийг цахим орчны эрсдэлээс хамгаалах арга хэмжээ авч эхэлжээ.
Одоо Францын шийдвэр хүүхдүүдийг үнэхээр хамгаалж чадах уу, эсвэл хоригийг тойрох шинэ аргууд бий болох уу гэдэг нь анхаарлын төвд байна.
Л.Баяр
