53 жилийн дараа NBA-ийн аварга болсон Нью-Йорк Никс багийн ялалт зөвхөн сагсан бөмбөгийн талбай дээр төдийгүй телевизийн дэлгэцэн дээр ч асар их амжилт дагууллаа. Никс болон Спөрс багуудын хооронд болсон NBA-ийн шигшээ цувралын тав дахь тоглолтыг дунджаар 24.5 сая хүн үзсэн нь 1998 оноос хойших хамгийн өндөр үзүүлэлт болсон байна. Үзэгчдийн тоо оргил үедээ 33 саяд хүрчээ.
Энэ үзүүлэлт нь NBA-ийн телевизийн үзэлт олон жилийн дараа дахин хүчтэй өсөж байгааг харуулж байна. Никсийн аваргын төлөөх түүхэн аялал, Сан Антониогийн залуу супер од Виктор Вембаньямагийн оролцоо, драматик өрнөл бүхий тоглолтууд үзэгчдийг дэлгэцийн өмнө уясан гэж шинжээчид үзэж байна.
Шигшээ цуврал нийтдээ 20.6 сая үзэгчтэй байсан нь 1998 оны алдарт Майкл Жорданы үеийн финалаас хойших хамгийн өндөр үзүүлэлт болжээ. Мөн ABC болон ESPN сувгууд NBA-ийн шигшээ тоглолтыг дамжуулж эхэлсэн 2003 оноос хойших хамгийн өндөр рейтингтэй финал болсон байна.
Тоглолтын гол баатар нь Никсийн холбон тоглогч Жален Брансон байв. Тэрбээр шийдвэрлэх тав дахь тоглолтод 45 оноо авч, багаа 94:90-ээр ялалтад хүргэн, Финалын үнэ цэнтэй тоглогчийн шагнал хүртжээ. Энэ нь Нью-Йорк хотын багийн 1973 оноос хойших анхны аварга болсон түүхэн мөч байлаа.
CNN-ийн онцолсноор энэхүү рейтингийн өсөлт нь стриминг үйлчилгээ давамгайлсан өнөө үед ч амьд спортын тэмцээнүүд телевизийн хамгийн үнэ цэнтэй контент хэвээр байгааг дахин нотолж байна. Дэлхийн аварга шалгаруулах тэмцээн, NBA-ийн финал зэрэг томоохон спортын үйл явдлууд сая сая хүнийг нэгэн зэрэг дэлгэцийн өмнө цуглуулж чаддаг цөөн контентын нэг хэвээр байгаа юм.
Л.Баяр
