Монгол Улсын Засгийн газрын “Аймгийн үнэт цаас гаргах зөвшөөрөл олгох тухай” тогтоол, Өмнөговь аймгийн ИТХ-ын “Аймгийн үнэт цаас гаргаж арилжих тухай” тогтоолыг үндэслэн Санхүүгийн зохицуулах хорооноос “Өмнөговь бонд”-ыг гаргах зөвшөөрлийг олгосон байна.

Өмнөговь аймаг, “Мандал капитал маркетс” ҮЦК-тай хамтран үнэт цаас гаргах үйл ажиллагааг хамтран хэрэгжүүлж, анхдагч зах зээлийн арилжааг албан ёсоор нээх “Цан цохих” ёслолыг зохион байгууллаа.

Ёслолын арга хэмжээнд УИХ-ын гишүүн, Эдийн засгийн байнгын хорооны дарга Р.Сэддорж, УИХ-ын гишүүн, Төсвийн байнгын хорооны дарга Н.Наранбаатар, Аймгийн ИТХ-ын дарга О.Эрдэнэ-Өрнөх, Аймгийн Засаг дарга Н.Энхбат, Санхүүгийн зохицуулах хорооны дэд дарга Т.Цэрэнбадрал, Монголын хөрөнгийн бирж ХК-ийн гүйцэтгэх захирал Д.Мөнхбат, “Мандал капитал маркетс ҮЦК-ийн гүйцэтгэх захирал А.Өлзийдэлгэр, Даланзадгад сумын Засаг дарга Ц.Дэнээдорж, Өмнөговь аймгийн ЗДТГ-ын дарга Ц.Амартөгс бусад албаны хүмүүс оролцлоо. 

“Манай аймаг улсын төсөвт ачаалал үүсгэхгүйгээр, өөрсдийн нөөц боломжид тулгуурлан 50 мегаваттын дулааны цахилгаан станц барих бүтээн байгуулалтыг хэрэгжүүлэхээр орон нутгийн анхны бондыг гаргаж байна” хэмээн Өмнөговь аймгийн Засаг дарга Н.Энхбат онцоллоо.

Нийт 500,000,000,000 төгрөгийн бондыг хэсэгчлэн гаргах юм. Үүнээс:

• 2026 онд: 150,000,000,000 төгрөг,

• 2027 онд: 300,000,000,000 төгрөг,

• 2028 онд: 50,000,000,000 төгрөгийг тус тус татан төвлөрүүлэхээр боллоо. 

2 жилийн хугацаатай, жилийн 16%-ийн хүүтэй, нэг бүр нь 100,000 төгрөгийн нэрлэсэн үнэ бүхий 1,500,000 ширхэг “Өмнөговь бонд”-ыг олон нийтэд нээлттэй арилжиж, нийт 150 тэрбум төгрөгийг татан төвлөрүүлэх арилжаа Монголын Хөрөнгийн Бирж дээр зохион байгуулагдлаа.