Хаврын улиралд хуурайшилт ихсэх болон иргэдийн санамсар болгоомжгүй үйлдлээс шалтгаалан гал түймэртэй холбоотой дуудлага, мэдээлэл нэмэгдэж байна.
Цагдаагийн байгууллагад өнгөрсөн 7 хоногт нийслэлийн Баянзүрх дүүргийн нутаг дэвсгэрт “Шар хоолойн ам”, Сонгинохайрхан дүүргийн нутаг дэвсгэрт иргэд шар өвс шатаахдаа гал алдснаас 15 га газар шатсан, мөн айлын гэр шатаж хохирол учруулсан гэх хэрэгт шалгалтын ажиллагааг үргэлжлүүлж байна.
Хувь хүний санамсар болгоомжгүйгээс үүдэн гал түймэр гарах эрсдэл их байдаг тул ихэнх нутгаар хуурайшилт өндөр, салхи, шуургатай өдрүүдэд иргэн бүр ой, хээрийн болон ахуйн гал түймрийн аюулаас урьдчилан сэргийлж хариуцлагатай байхыг цагдаагийн байгууллагаас анхааруулж байна.
