УИХ-ын чуулганы хуралдаанаар АТГ-ын дарга З.Дашдавааг улируулан томилох асуудлыг хэлэлцэх үеэр Ерөнхий сайд Л.Оюун-Эрдэнэ дараах байр суурийг илэрхийлсэн юм. 

Тэрбээр "Би Авлигатай тэмцэх газар дээр очиж ажиллана гэсэн бодолтой байгаа. Би нэг ч удаа очиж байгаагүй. Удирдлагуудтай санал солилцож, хамтарч ажиллая гэж байгаагүй, энэ бол зарчим гэж бодож байна. Засгийн газрын тухайд эрх зүйн орчин, иргэдийн мэдэх эрхийг хангаж авлигын асуудлыг олон нийтийн анхаарлын төвд оруулах тал дээр ажилласан. Авлигын төсөөллийн индекс бол олон нийтийн дунд байгаа төсөөлөл. Засгийн газраас бүх сан, нүүрс, зээлийг прокурорын зөвшөөрөлтэйгөөр ил болгосон. Хоёр гурван ч жагсаал болж, парламент дээр хоёр гурван ч төрлийн сонсгол болсон. Энэ нь авлигатай тэмцэх чиг үүрэгт туйлын чухал мөртлөө төсөөллийг нэмэгдүүлдэг. Энэ бол аль ч улсад байдаг асуудал. Хураагдсан хөрөнгийг Үндэсний баялагийн сангаар дамжуулж, хүүхэд, гэр бүл, ирээдүйн сайн сайхны төлөө зарцуулах нь зөв юм" гэлээ.