Таван тивийн 62 орны 404 жүдоч хүч үзэх Бакугийн Их дуулга тэмцээн өнөөдөр өргөн үүдээ нээлээ. Азербайжаны Баку хотноо эхэлж буй уг тэмцээнд манай улсаас ганцхан жүдоч оролцож буй нь хачирхалтай. Түүнийг Б.Сүхбат гэдэг. Бид та бүхэнд түүнийг танилцуулж байна. 

Баримт 1

Бямбасүрэнгийн Сүхбат нь -60 кг-д барилддаг. 

Баримт 2

Тэрбээр 2000 оны долдугаар сарын 27-нд төрсөн. 23 настай ажээ. 

Баримт 3

Одоогоор 24 оноотой дэлхийн чансааны 280 дугаар байрт бичигдэж буй. 

Баримт 4

2015 оны өсвөрийн Азийн аварга шалгаруулах тэмцээнээс хүрэл медаль хүртсэн нь түүний анхны олон улсын тэмцээнээс хүртсэн шагнал байв. 

Баримт 5

2017 онд дээрх амжилтаа ахиулж, мөнгөн медаль хүртжээ. 

Баримт 6

2019 оны Алматы өсвөрийн Азийн цомоос алтан медаль хүртсэн нь түүний олон улсын цорын ганц алтан медаль юм. 

Баримт 7

2019 оны Ази-Далайн өсвөрийн аварга шалгаруулах тэмцээн, 2020 оны Варшавын Европын нээлттэй тэмцээнээс хүрэл медаль хүртэж байсан.  

Баримт 8

Женко клубийн нэр дээрээс барилддаг Б.Сүхбат өнгөрсөн онд улсын аварга болсон. 2022 онд ч бас тэр жиндээ аваргалж байлаа. Мөн тэр өсвөрийн улсын аварга.

Баримт 9 

49 дүгээр дунд сургуулийг дүүргэжээ.

Баримт 10

Аварга биеийн тамирын дээд сургуулийг багш, дасгалжуулагч мэргэжлээр төгссөн.

Баримт 11

Түүний ээжийн дүү нар болон өвөө нь барилддаг улс байжээ. 

Баримт 12

"Би 2020 онд өвдөгний бэртэл авсан. Хагалгаанд орж, эмнэлгээс гараад, бэртэл эдгэх хүртлээ сайн тамирчин болно, олимпийн аварга болно гэж боддог байлаа. Гэхдээ бэртсэний дараа хүн хүн чанартай байх хэрэгтэй л юм байна гэж ойлгосон. Тэр ч утгаараа сайн аав, сайн хань байхыг л миний амьдралын зорилго гэж хэлнэ. Тийм байхыг ч хичээж байна" гэж хэвлэлд ярьжээ. 

Л.Сайнаа