Дэлхийн чанарын 7 хоногоор “Үндэсний чанарын шагнал-2023”-ын эздээр дараах гурван байгууллага, аж ахуйн нэгж шалгарлаа.
Үүнд:
- Шилдэг аж ахуйн нэгжээр “Эрдэнэт үйлдвэр” ТӨҮГ
- Шилдэг бүтээгдэхүүнтэй компаниар “Милко” ХХК-ийн “Монголиан камел” бүтээгдэхүүн,
- Шилдэг үйлчилгээтэй байгууллагаар “Скай Хайпермаркет” ХХК шалгарлаа.
“Эрдэнэт үйлдвэр” нь лабораторийн чанарын менежментийн тогтолцоог олон улсын стандартын дагуу хэрэгжүүлснээс гадна гадаадын ALS Group; Alfred H Khight Asia Analytical болон RC Inspection Asia Assayers байгууллагаар хөндлөнгийн хяналтыг хийлгэж бүтээгдэхүүний чанарыг баталгаажуулж иржээ.
“Милко” ХХК-ийн “Монголиан камел” буюу “Ингэний хоормог” нэрийн бүтээгдэхүүн нь энгийн болон баяжуулсан гэсэн 2 төрөлтэй. Тухайн бүтээгдэхүүний үйлдвэрлэл жилээс жилд нэмэгдэж, 2021 онд 17.3 мян.тонн байсан бол 2023 оны эхний 9 сарын байдлаар 63.7 мянган тонн болж өсөн БНХАУ-ын зах зээлд экспортолж байна.
“Скай Хайпермаркет” ХХК нь БНСУ-ын жижиглэн худалдаа сүлжээ болох Имарт хайпер маркетийг франчайзингийн эрхтэйгээр явуулж, үйлчилгээний чанар хүртээмжийг хангах хүрээнд холбогдох хууль тогтоомж, стандартыг мөрдөхөөс гадна 40 гаруй дүрэм журам болон итгэмжлэгдсэн лабораториар дамжуулан дотоод хяналтыг хэрэгжүүлж байна.
