"Үзэсгэлэн болгогч" хэмээх усан туулай жилийн зуны тэргүүн сар тавдугаар сарын 20-нд эхэлсэн. Харин зуны тэргүүн сарын шинийн 15 буюу Бурхан багшийн их дүйчин өдөр ирэх Ням гаригт тохиож байна. Энэ өдөр бүх нийтээрээ амрах хуультай ч Ням гаригт таарч байгаа бөгөөд нийтийн арга хэмжээнүүд зохион байгуулагдах аж.

Бурхан багшийн Их дүйчин өдөр 10 хар нүглийг тэвчиж, 10 цагаан буяныг туурвих учиртай. Тиймээс тухайн өдөр буян үйллэхийг эрхэмлэж, мацаг барих нь тустай байна. Тус өдрийг угтаж энэ долоо хоногт Гандантэгчэнлин хийдэд бүрэн хэмжээний арга хэмжээнүүд болж байга билээ. Өнөөдөр /2023.06.01/ мөн тус буян номын үйл ажиллагаа үргэлжлэх юм.

Мөн тухайн өдөр хэрүүл тэмцэл хийх, хулгай хийх, амьтны амь таслах, өс хонзон санах, бусдыг доромжлон гүтгэх, өгөөгүйг авах зэрэг үйлийг цээрлэдэг. Бурхан багшийн их дүйчэн өдөр нь билгийн тооллын зуны эхэн сарын 15-нд тохиодог. Энэ өдөр Бурхан багшийн лагшин мэндэлсэн, төгс гэгээрлийн хутгийг олсон, нирваан дүрийг үзүүлсэн гэсэн гурван үйл давхацдагаараа бусад дүйчэн өдрөөс машид онцлогтой. Эл өдөр нялхсыг баярлуулж, ядууст өглөг өгч, эцэг, эхийгээ ачилж, цагаан хоол идэж, хамаг амьтныг энэрч, нигүүлсэх сэтгэлээр хандан өнгөрүүлдэг. Энэ өдөр хийсэн буян мянга, түм арвижна гэж үздэг байна.