Монгол, Япон улсын хооронд дипломат харилцаа тогтоосны 50 жилийн ойн хүрээнд Монголын тэшүүрийн холбоо, Японы тэшүүрийн холбоотой хамтран анх удаагаа “Тал нутгийн мөсөн шоу” арга хэмжээг нэгдүгээр сарын 27-28-нд "Степпе Арена"-д зохион байгуулахаар болжээ. Арга хэмжээний хүрээнд Япон улсын шилдэг уран гулгагчид болох Рика Хонго, Цүнэхито Каракава, Чисато Үрамацү, Хирако Хонда болон Монголын мэргэжлийн уран гулгагч Гансүхийн Марал-Эрдэнэ нар оролцох ажээ.
Японы тамирчдын хамгийн алдартай нь болох 26 настай Рика Хонго ISU-гийн томоохон тэмцээн “Four Continents” буюу дөрвөн тивийн аварга шалгаруулах тэмцээнд 2015, 2016 онд хүрэл медаль, “Rostelecom” Гранпри, “Finlandia” турнир тэмцээнээс алтан медаль хүртэж байсан. Тэрбээр 2015 онд хамгийн оргил амжилтаа үзүүлж, өрсөлдөөн ихтэй Японы улсын аваргаасаа мөнгө, “Four Continents”-т хүрэл медаль хүртэж, “Rostelecom Cup” Гранпри болон Азийн нээлттэй тэмцээнд түрүүлж байв.
