Энэ жилийн Үндэсний их баяр наадмаар улсын начин цол хүртсэн бөхчүүдийг цувралаар хүргэж байгаа билээ. Энэ удаа Увс аймгийн Тэс сумын уугуул улсын начин Х.Оргилболдыг онцолж байна.

Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110,111, Ардын хувьсгалын 100, 101 жилийн ой Үндэсний их баяр наадмын хүчит бөхийн барилдаанд Увс аймгийн Тэс сумын уугуул Хүрэлбаатарын Оргилболд тав давж, улсын начин цол хүртсэн билээ. Тэрбээр 1992 оны гуравдугаар сарын 6-нд Увс аймгийн Тэс суманд төрж өсжээ.

Сумын заан цолоо 2011 онд хүртэж байв. Харин 2013 оны Увс аймгийн баяр наадамд аймгийн арслан Л.Цээсүрэнгээр найм даван түрүүлж " Аймгийн арслан " цол хүртсэн юм. Аймгийн арслан цол хүртсэний дараа жилийн Увс аймгийн баяр наадамд долоо давж, аймгийн арслан Л.Жамсранд өвдөг шороодон үзүүрлэсэн.

Х.Оргилболд нь “Увс нуур” дэвжээ, “Хүч” спорт хороо, Кровн Брос ХХК-ийн харьяат бөх юм.

Тэрбээр энэ жилийн Үндэсний их баяр наадмаар дараах бөхчүүдийн давж Улсын начин цол хүртжээ. 

• Нэгийн даваанд Сумын заан Э.Сосорбарам /Архангай аймаг/
• Хоёрын даваанд Аймгийн арслан Ч.Мөнхтогтох /Завхан аймаг/
• Гурвын даваанд Улсын харцага Л.Пүрэвжав /Дундговь аймаг/
• Дөрвийн даваанд Улсын начин Б.Амарзаяа /Архангай аймаг/
• Тавын даваанд Улсын харцага Ц.Мөнхбаяр /Увс аймаг/ давж улсын начин цол хүртжээ.

Д.Батчулуун