Олон түмнийхээ хайр хүндлэлийг хүлээсэн энэ жилийн түрүү бөх О.Хангайтай ярилцаж, баяр наадмын тухай сэтгэгдлийг нь сонслоо. 

- Улсын баяр наадмын түрүү болж, мянган бөхчүүдийн тэргүүн болсонд баяр хүргэе. Баярын сэтгэгдлээ хуваалцаач?

-Баярлалаа. Цар тахлын дараа 100, 101 жилийн ойн баяр наадам сайхан болж байна. Аварга хэмээх цолтны эгнээнд багтсандаа баяртай байна. Өнөөдөр хүртэл итгэхгүй л явж байна. Аав ээждээ, ханьдаа, намайг дэмжин ажилладаг компаниудын хамт олонд талархаж буйгаа хэлмээр байна. 

-Сүүлийн барилдаан дээр гар нь өвдөөд байгаа харагдсан. Түрүү бөхийн барилдааны тухай хуваалцахгүй юу?

-Хоёр гарын алга татчихсан. Очиж бариулаад гайгүй болсон. Тэгээд л барилдаанаа үргэлжлүүлсэн дээ.

-Таны бясалгаад сууж буй зураг цахим орчинд тавигдсан. Бие бялдрын болоод сэтгэл зүйн бэлтгэл сайн байсан уу?

- Тийм ээ. Бүх зүйл жигдэрч байж л барилдаанд амжилт гаргана шүү дээ.

-Б.Мөнхбаатар засуулаар аварга хэмээн цолоо дуудуулсан шүү дээ. Энэ талаар ярихгүй юу?

- Харцагуудын шоу болсон шүү дээ. Тэгэхэд Б.Мөнхбаатар ахаараа цол дуудуулаад, араас нь Д.Ганзориг ах маань тайлбар хийсэн. Их бэлгэшээлтэй, сайхан зүйл болсон. Биеллээ олсонд баяртай байна.

-Баярлалаа. Сайхан наадаарай.