“PGL MAJOR ANTWERP 2022” буюу и-спортын хамгийн том төрлүүдийн нэг болох CS:GO-ийн ДАШТ Бельги улсын Антверпен хотод өчигдөр эхэлсэн. Уг тэмцээн нь өөр өөрсдийн бүсээсээ шалгарсан дэлхийн шилдэг 24 багийн дунд тавдугаар сарын 9-23-ны хооронд зохиогдох бөгөөд Монгол улсыг төлөөлөн IHC Esports оролцож байгаа. IHC Esports-ын бүрэлдэхүүнд Г.Бямбасүрэн (blitz), С.Мөнхболд (Techno4k), Б.Бат-Энх (kabal), Г.Есөнтөмөр (nin9), Б.Тэнгис (sk0r), Б.Батболд (Bart4k), Э.Баянбат (maaRaa, дасгалжуулагч) гэх тамирчид багтаж байна. Уг багийн хувьд өчигдөр тэмцээнийхээ эхний хоёр тоглолтыг хоёуланг нь Нюк дээр хийж Данийн Астралис багт 16:2, АНУ-ын Комплексити багт 16:13 харьцаатайгаар тус тус ялагдал хүлээсэн. Ийнхүү хоёр удаа ялагдсан тул тэд өнөөдөр 20:30-аас өөрсдийн адил хоёр ялагдалтай Австралийн Ренегейдс багийн эсрэг тоглоно. Тус тоглолтод ялагдал хүлээсэн баг нь дүрмийн дагуу энэ удаагийн тэмцээнээс хасагдана.
