Европын хөлбөмбөгийн лигүүдийн хамгийн шилдэг багууд оролцдог Аваргуудын лигийн шөвгийн 16-н тоглолтууд маргааш өглөө (бидний хэлш заншсанаар өнөөдөр орой) манай орны цагаар 4:00-нд эхэлнэ. Аваргуудын лигийн хэсгийн шатны тоглолтууд арван хоёрдугаар сарын 10-нд өндөрлөж шилдэг 16 багийн нэрс тодроод байсан бөгөөд ийнхүү хоёр сар гарангийн хугацаанд завсарласны эцэст эргэн ирж байна.
Шөвгийн 16-н эхний тоглолтод Аваргуудын лигийн 13 удаагийн аварга Испаны эзэн хааны баг Реал Мадрид клуб Францын Парис Сен-Жермен клубын талбайд зочлон очиж тоглох бол нөгөө талд Португалийн Спортинг Лисбон Премьер лигийг итгэл төгс тэргүүлж буй Манчестер Сити клубыг талбай дээрээ хүлээн авч тоглоно.
Энэхүү шатанд багууд нэгнийхээ талбайд ээлжлэн зочлон тоглож хоёр тоглолтын нийлбэр дүнгээр ялагчаа тодруулан дараагийн шатанд шалгардаг билээ.
П.Тамир
