Өвлийн XXIV дахь удаагийн олимпын наадам өнөөдөр манай урд хөрш БНХАУ-н нийслэл Бээжин хотод хөшгөө нээж байна. Нийт 16 өдрийн туршид үргэлжлэх тус арга хэмжээнд дэлхийн 91 орны 2,871 тамирчид хүч сорин өрсөлдөнө. Мөн олимпын наадам бүр зохион байгуулагч улсынхаа шинж чанарыг агуулсан бэлгэ тэмдэг буюу маскоттой байдгийг та бүхэн мэднэ. Энэ удаагийн “Бээжин 2022” өвлийн олимпын маскот нь Бинг Двен Двен гэх мөсний өмсгөлтэй хулсны баавгай юм.

Хулсны баавгайн зөвхөн БНХАУ-н нутаг дэвсгэрт амьдардаг дэлхийн улаан номонд бүртгэгдсэн ховор амьтан билээ. Уг амьтан нь Бээжин 2008 зуны олимпын таван маскотын нэг байсан бөгөөд энэ удаад дахин өвлийн олимпын наадмын маскотоор сонгогдож байгаа юм. Бинг Двен Двенийг 2019 оны есдүгээр сарын 17-нд дэлхий даяарх 5,816 загвар зохион бүтээгчдийн илгээсэн загварууд дундаас сонгон авч албан ёсоор олимпын бэлгэ тэмдэг болгож баталсан.

П.Тамир