Монгол Улсын заан Цэдэнбазарын Одбаярын заан цолонд хүндэтгэл үзүүлэх улс, аймгийн цолтой бөхийн барилдаан Өмнөговь аймгийн Биеийн тамир, спорт зааланд өчигдөр боллоо. Барилдаанд улсын заан Д.Анар, харцага О.Хангай, Б.Цэдэнсодном, начин Ч.Батчулуун, Н.Мустафа, Л.Лха-Очир, Г.Ганжад тэргүүтэй 64 бөх барилдав. Энэ барилдаанд улсын заан Д.Анар түрүүлж, харцага О.Хангай үзүүрлэлээ. Д.Анар сүүлд оролцсон хоёр барилдаандаа дараалан түрүүлж буй бол О.Хангай хоёр дараалан үзүүрлэж байна. Их шөвөгт харцага Б.Цэдэнсодном, начин Ч.Батчулуун нар шалгарлаа. Тус барилдаанд түрүүлсэн бөхийг таван сая, үзүүр бөхийг гурван сая төгрөгөөр мялаажээ.
