Францын нийслэл Парис хотод 20-иос дээш жилийн насжилттай автомашины хөдөлгөөнийг хязгаарлах журмыг баталсан байна. Ингэснээр 7 сарын 1-ээс эхлэн Парисын агаарын бохирдлыг бууруулах хөтөлбөрийн хүрээнд бямба, ням гарагт 1997 оноос өмнө үйлдвэрлэсэн автомашинаар зорчих эрхийг хасжээ.

Мөн Парисын замын хөдөлгөөнд оролцох автомашинуудыг 6 ангилалд хувааж, салхины шилэн дээр нь тусгай тэмдэглэгээ бүхий наалт наах болсон байна. Наалтын зэрэглэлээс хамаарч хотын зарим бүсэд зорчих боломжийг хязгаарлаж байгаа юм. Харин 1-р зэрэглэлийн буюу чөлөөтэй зорчих эрхтэй наалтыг устөрөгч, цахилгаан хөдөлгүүрт автомашинуудад олгож байна.

Парис хотын захиргаанаас мэдээлснээр 2020 он гэхэд бүх төрлийн дизель хөдөлгүүрт автомашинд хориг тогтоох төлөвлөгөөтэй байгаа аж.