Йордан улсад суух Иракийн онц бөгөөд бүрэн эрхт элчин сайд Сафиа Аль Сухайл хоёр улсын хаагдаад байсан хил хоёр долоо хоногийн дараа эргэн нээгдэнэ хэмээн мэдэгдсэн байна. 11 сарын турш хаагдсан хил эргэн нээгдсэнээр хоёр талын худалдаа сэргэж эхлэхээс гадна мөн Йордан руу гарсан Иракийн дүрвэгсэд эх орондоо буцаж ирэх боломжтой болж байгаа юм. Тухайн хилээр орж, гарч байсан ачааны автомашинуудаас Исламын Улс бүлэглэлийн зүгээс дур мэдэн татвар авч байсан явдлыг таслан зогсоохын тулд 2015 оны 7 дугаар сард хилийг Иракийн зүгээс хаасан юм. Хил хаасан явдал нь Йорданы эдийн засагт багагүй хэмжээний цохилт өгч, 2015 онд Ирак руу гаргасан экспортын хэмжээ 2014 оныхтой харьцуулахад 470 сая ам.доллараар буурсан байна.

Ганбаатар Мөнх-Эрдэнэ/UBS/