Олимпийн бамбарыг зохион байгуулагч Бразил улсад хүлээлгэн өгөх ёслолын ажиллагаа уржигдар Грекийн нийслэл Афин хотын Панатениак цэнгэлдэх хүрээлэнд зохион байгуулагдлаа. Арга хэмжээний үеэр олимпийн бамбарыг Грекийн Үндэсний Олимпийн хорооны ерөнхийлөгч Спирос Капралос РИО 2016 Олимпийн наадмыг зохион байгуулах хорооны тэргүүн Карлос Нузманд гардуулан өгсөн байна. Энэхүү ёслолын ажиллагаанд мөн Грекийн Ерөнхийлөгч Прокопис Павлопоулос болон Олимпийн хорооны албаны хүмүүс оролцжээ.

Олимпийн галт бамбар Бразил улсад ирэх сарын 3-ны өдөр ирэх бөгөөд галт бамбарын аялал Олимпийн нээлтийн ёслолоос өмнө Бразил улсын нутаг дэвсгэрээр үргэлжлэн явагдах болно. Зуны Олимп 8 дугаар сарын 5-ны өдөр Рио Де Жанейро хотын Маракана цэнгэлдэх хүрээлэнд нээгдэж, 8 дугаар сарын 21-ний өдрийг дуустал явагдах болно.

Ганбаатар Мөнх-Эрдэнэ/UBS/