Найруулагч Ж.Сэнгэдоржийн бүтээл “Үргээлэг” кино өнгөрсөн 2014 онд нээлтээ хийж, үзэгчдийг байлдан дагуулж тухайн жилийнхээ шилдэг бүтээлээр нэрлэгдэн “Гранпри” шагнал хүртсэн билээ.
Тэгвэл кино драмын А-ГРУПП болон Юнител группийн ПРАЙМ пикчэрсийн хамтран хийсэн энэ оны ээлжит тэсрэлт “ҮРГЭЭЛЭГ 2” уран сайхны кино байв. Энэхүү кино гуравдугаар сарын 19-нд нээлтээ хийсэн билээ. Дэлгэцэнд гарсан цагаасаа эхлэн танхим дүүрэн үзэгчтэй байгаа “ҮРГЭЭЛЭГ 2” киноны өдөрлөг өнгөрсөн амралтын өдөр “Гэгээнтэн Энтертайнмент Төвд” болов.
Өдөрлөгт киноны уран бүтээлчид хүрэлцэн ирсэн бөгөөд 8 настай балчираас 80 настай ахмад оролцсон юм. Энэхүү кино, уран бүтээлчид хэдийнэ үзэгчдийн талархалыг хүлээсэн басхүү хүсэн хүлээж байсан кино болох нь өдөрлөгт хүрэлцэн ирсэн хүмүүсийн баяр хөөр, сэтгэл догдлолоос илхэн харагдаж байв. Киноны уран бүтээлчид өдөрлөгийн үеэр үзэгч фенүүддээ гарын үсгээ өгч, хамт гэрэл зургаа татуулсан нь ч басхүү эгэл атлаа гайхамшигтай үйл явдал болсон юм.
Дашрамд өгүүлэхэд Үргээлэг II-ийн ажил 2015 оны 7 сараас эхэлсэн бөгөөд 300 гаруй уран бүтээлч орсны дээр Орос, Хятадын уран бүтээлчид тоглосон байна. Уг киног бүтээхэд нийт 620,0 сая төгрөгийн зардал гаргасан байна. Киноны пиротехникийн ажлыг Казахстаны Nomad Stunts хийсэн бол киноны постпродакшний ажлыг Хонг Конгийн Digital Magic студид хийжээ. Ингээд “ҮРГЭЭЛЭГ 2” киноны өдөрлөгөөс хийсэн фото сурвалжлагаа хүргэе.
