АНУ-ын Ерөнхийлөгч Барак Обама даваа гаригт Тонер Прайз хэмээх сэтгүүлзүйн шагнал гардуулах ёслолд оролцох үеэрээ энэ жилийн Ерөнхийлөгчийн сонгуулийн эргэн тойрон дахь улс төрийн нөхцөл байдал болон олон нийтийн хэвлэл мэдээллийн хэрэгслүүдийн хандлагын талаар өөрийнхөө байр суурийг илэрхийлсэн байна.

Ялангуяа тэрээр сэтгүүлчдэд хандан нэр дэвшигчдийн талаар бичиж, нийтлэхдээ дээд зэргийн ёс зүйтэй байхыг уриалсан байна. Түүний оролцсон Тонер Прайз шагнал гардуулах ёслолыг The New York Times сонины анхны үндэсний улс төрийн сурвалжлагч болох Робин Тонерийн сэтгүүлзүйд оруулсан хувь нэмэр, өндөр гавьяаг нь хүндэтгэн зохион байгуулдаг болсон байна. Тэрээр 2008 онд нас барсан бөгөөд мэргэжлээрээ 25 жил ажиллахдаа таван  Ерөнхийлөгчийн сонгуулийн талаар мэдээ, сурвалжлага бэлтгэж байсан түүхтэй юм байна.

Робин Тонер улс төрийн нөхцөл байдлын талаар өөрийнхөө зүгээс олж мэдэж чадах хамгийн үнэн мэдээллийг олон нийтэд өгдөг байсан бөгөөд сэтгүүлзүйн хувьд үүнээс эрхэм, чухал зүйл гэж үгүй юм хэмээн АНУ-ын Ерөнхийлөгч Барак Обама хэлсэн байна.

Ганбаатар Мөнх-Эрдэнэ /UBS/