2015-2016 оны хичээлийн жилд манай ЭСЯ Вашингтон хотын шинжлэх ухаан, технологи, инженерийн гүнзгийрүүлсэн сургалттай МакКинли дунд сургуультай хамтран Монголын түүх, соёлыг сурталчлан таниулах хөтөлбөр гарган ажиллаж байна.
“Washington Performing Arts” байгууллагын “Embassy Adoption” хөтөлбөрийн хүрээнд тус сургуулийн VI дугаар ангийн нийгмийн ухааны хичээлийн хөтөлбөрт багтжээ.
Нэгдүгээр сард АНУ-ын Гадаад харилцааны хүрээлэнгийн багш М.Саруул-Эрдэнэ тус сургуульд зочилж Монголын түүх, соёл, хэл бичгийн талаар мэдээлэл өгч, Алунгуа эхийн домгийг ярьж сонирхуулсан юм.
Энэ сард Зураач, барималч Н.Ганхуяг Бурханы шашины соёл, урлагын талаар хичээл орж, цам бүжгийн утга санааг тайлбарлан таниулав. Хичээлийн төгсгөлд хүүхдүүд цамын баг зохион зурж, ямар утга, сайн санааг илэрхийлэн зурснаа тайлбарлаж ярилцлаа.
Энэ хөтөлбөр зургадугаар сар хүртэл үргэлжлэх бөгөөд ЭСЯ-ны зүгээс Монголын мэргэжлийн уран бүтээлчид, оюутнуудтай хамтран монгол бүжиг зааж, уур амьсгалын өөрчлөлтийн талаар манай улсын хэрэгжүүлж буй бодлогыг таниулах зэрэг арга хэмжээг явуулахаар төлөвлөөд байна.
Хөтөлбөрийн төгсгөлд сурагчид ЭСЯ-нд зочилж жилийн турш сурсан мэдсэн зүйлээ үзүүлж сонирхуулах бөгөөд зургадугаар сард болох “Model UN” хөтөлбөрт Монгол Улсыг төлөөлөн оролцоно хэмээн ГХЯ-наас мэдээллээ.
Батсүх Хонгорсайхан /UBS/
