Амралт зугаалгын бизнесийн салбарт тэргүүлэгч Америкийн “Six Flags Over Georgia” компаний зүгээс зөвхөн зул сарын баярын улиралд зориулан “Holiday in the Park” хэмээх соёл амралтын хүрээлэнг барьж байгуулан,  нээсэн талаар урьд өмнө мэдээлж байсан билээ. Тэгвэл өнгөрсөн амралтын өдрүүдээр уг цогцолборт зул сарын гацуур модны доор хамгийн олон хос үнсэлцсэн Гиннесийн дээд амжилтыг тогтоогоод байна. Нийт 201 хос буюу 402 хүн 10 секундын турш үнсэлцсэнээр ийнхүү дээд амжилтыг тогтоосон байна. Уг арга хэмжээг мөн амны хөндийн ариун цэврийн бараа бүтээгдэхүүний үйлдвэрлэлээрээ дэлхийд тэргүүлэгч Дентек компанитай хамтран зохион байгуулсан байна. “Энэ бол миний харж байсан хамгийн гайхалтай үйл явдал байлаа. Энэхүү амжилтыг тогтоох арга хэмжээнд оролцсон хүн бүр маш их аз жаргалтай байсан. Бүх л амьдралын маань туршид хэзээ ч мартагдахааргүй дурсамжыг үлдээсэн сайхан үйл явдал боллоо” хэмээн Дэлхийн Гиннессийн Амжилтын шүүгч, бүртгэгч Тавиа Леви сэтгэгдлээ хуваалцсан байна.

Ганбаатар Мөнх-Эрдэнэ /UBS/