Чойжин ламын сүм музейгээс санаачлан “Авьяаслаг Азичууд” буюу Asian’s got talent тэмцээний дэд байрын шагналт “Хөсөгтөн” хамтлагтай хамтран “Шөнийн музейд Хөсөгтөн” ардын урлагийн тоглолт, арга хэмжээг ирэх сарын 9-нд зохион байгуулна.

Тус музейн хамт олон музейн үйлчилгээг сонирхолтой хэлбэрээр олон нийтэд хүргэх, музейг түшиглэн аялал жуулчлалыг хөгжүүлэх, олон талт соёлын арга хэмжээ зохион байгуулах бодит боломж байгааг дэлгэн харуулах зорилгоор 2011 оноос эхлэн жил бүр энэхүү арга хэмжээг зохион байгуулж байгаа юм.

Энэхүү арга хэмжээнд хүрэлцэн ирснээр Монголын түүх соёлын үнэт өв болох Чойжин ламын сүм музейн арвин баялаг сан хөмрөг, хосгүй үнэт бүтээлүүдийг үзэж мэлмий баясгахын зэрэгцээ музейн өвөрмөц тансаг орчинд тухлан тус хамтлагийн ардын урлагийн тоглолтыг үзэж,сонирхох боломжтой юм. 

Хүрэлцэн ирсэн зочид, үйлчлүүлэгч та бүхэн анхилуун үнэрт цэцэрлэгт тухалж, цагаан идээ, сайн чанарын дарс, амтат хөнгөн зууш зооглон нэгэн үдшийг тав тухтай, дурсамж дүүрэн өнгөрүүлэх боломжтой бөгөөд дээрх бүгд тасалбарын үнэд багтсан болно.

Тасалбарын үнэ суудлын зэрэглэлээс хамааран 50-100 мянган төгрөгийн үнэтэй байна. 

Энэ арга хэмжээний хөтөлбөрийг танилцуулж байна.

20:00-21:00 Чойжин ламын сүм музей үзэх
21:00-21:30 Арга хэмжээний нээлтийн үйл ажиллагаа
21:30-23:00 “Хөсөгтөн” хамтлагийн ардын урлагийн тоглолт
23:00-00:00 Шөнийн музей үзэх