Өнөөдөр Камертон хамтлагийн 20 жилийн ойн өдөр тохиож байна.
Тэд 20 жилийн ойгоороо бие даасан тоглолт зохион байгуулалгүй “Crocus event hall”-д 20:00 цагт “VIBE 105.5fm-ийн нээлтийн “Black & White party”-д оролцож, фенүүдтэйгээ төрсөн өдрөө тэмдэглэн өнгөрүүлэхээр болжээ.
Камертоныхонтой төрсөн өдрийг нь хамт тэмдэглэхээр ирэх зочид зөвхөн хар, цагаан өнгийн хувцас өмссөн байх ёстой юм байна. Тоглолтонд мөн Никитон, Люмино зэрэг хамтлаг дуучид ирэх аж.
Өнөөдрөөс яг 20 жилийн өмнө 6 сарын 24-нд хөгжим бүжгийн коллежийн оюутан Д.Болд, Г.Мэнд-Амар нар Б.Ган-Эрдэнэ, Б.Эрдэнэбат хоёрт хамтран дуулах санал тавьснаар “Камертон” хамтлаг анх байгуулагдаж байсан байна.
Хамтлаг байгуулагдсан цагаас хойш арван цомог гаргаж, 15 тоглолт хийж, “шилдэг поп хамтлаг”, “шилдэг бүтээл”, “Алтан микрофон” наадмын “шилдэг хамтлаг”, “шилдэг цомог”, “Пентатоник” наадмын “шилдэг хамтлаг”-аар тус тус шалгарч байжээ.
