ЭХЭМҮТ-ийн хашаанд баригдаж байгаа "Цусны эмгэг хорт хавдартай хүүхдийн эмнэлэг"-ийг санаачилж, барилгын ажлыг нь өөрийн болон сайхан сэтгэлт хүмүүсийн өгсөн хандиваар үргэлжлүүлж яваа АНУ-ын Блүүмингтон хотын Буддын сүмийн тэргүүн Ажиа рэнбүүчигийн тухай 24 баримтыг хүргэж байна.

1.    Ажиа рэнбүүчи 1950 оны 9 дүгээр сарын 21-нд Түвдийн Хөх нуурт 11хүүхэдтэй өнөр өтгөн айлд төржээ. Тэрээр өөрийгөө Хөхнуурын дээд монголчуудаас гаралтaй гэдэг.

2.   Түүнийг хоёр настай байхад Богд Зонховын эцэг Ажиа гэгээний наймдугаар хойд дүрээр залж “Ажиа Дампэй Гялцан” хэмээн өргөмжилжээ. Гэгээнээр тодруулсны дараа тэрээр Гүмбүм хийдэд шавилан суусан байна.

3.    Ажиа рэнбүүчи нь багаасаа Буддын гүн ухааны мэргэжсэн багш нараар судар, далд ухааны эрдмийг заалгаснаас гадна Буддын урлахуйн ухаан, уран барималыг нарийн судалсан хүн юм.

4.    Хятадын соёлын хувьсгалын үеэр Ажиа рэнбүүчи Хятад сургуульд хүчээр суралцаж хажуугаар нь Буддын багш нараар нууцаар хичээл номлолоо үргэлжлүүлэн заалгаж байсан гэдэг. Мөн тэрээр хөдөлмөрийн зусланд 16 жилийн турш албан хүчээр ажиллаж байжээ.

5.    Соёлын хувьсгалын дараагаар тэрээр сүм хийдүүдийг сэргээн босгож, судар номыг сэргээн засварлах ажлыг эхлүүлж 1991 оноос Гүнбумын улаан загалмайн нийгэмлэгийг байгуулж Түвдийн ард түмний тусын тулд эмнэлэг сургууль байгуулах ажлыг хийж эхэлсэн байна.  

6.    1998 онд Төвдийн улс төрийн хурцадмал байдлын улмаас Ажиа рэнбүүчи АНУ-руу дүрвэн гарчээ. Ингээд Калифорния мужийн Милл-валлей хотод очиж “Энэрэл нигүүлсэлийн төв”-ийг үүсгэн байгуулжээ.

7.    Түүнийг 2005 онд Дээрхийн гэгээнтэн 14-р Далай лам Индиана мужийн Блумингтонд “Төвд-Монголын Буддын соёлын төвийн захиралаар томилжээ.

8.    Ажиа рэнбүүчи Монголд анх 2006 онд ирж байжээ. Тэрээр нэгэн сонинд өгсөн ярилцлагадаа “Улаанбаатарын Буянт Ухаа онгоцны буудалд буулаа гэхэд  миний сэтгэл маш их хөдлөж билээ. Тэндээс эхлээд л хаа сайгүй монголоор ярьж их сайхан байсан” гэжээ.  

9.    Тэрээр хамгийн анх 2010 онд Родэл прэсс сэтгүүлд “Лууг даван тэссэн нь” гэсэн гарчигтай дурдатгал нийтлэлээ бичсэн байдаг. Улмаар өөрийн дурдатгал номыг хэвлүүлсэн байдаг бөгөөд Монгол хэлнээ “Цагийг бэлэгдэгч наран чөлөө” хэмээн орчуулагдсан байдаг.

10.    Ажиа гэгээн энэрэл нигүүлсэлийг тайлбарлахдаа: “Энэрэл нигүүлсэл бол зөвхөн бясалгал хийгээд залбирал биш, харин энэрэл нигүүлсэл бол өдөр тутмын амьдралын ёс жаяг байх ёстой. Өөрөөр хэлбэл ариун орон гэдэг бол төсөөлөл биш бөгөөд бид үнэнг эрэлхийлж, Нирван дүр доторх Самсара-г өөрчилснөөр дэлхий дээрх диваажинг бид бүтээх юм” гэжээ.

11.   2008 оноос эхлэн Ажиа Рэнбүүчи Гэгээнтэний мэлмий гийсэн өдөрт зориулан Америкийн Монголчуудын Даншиг наадам, Монгол-Төвдийн Шашин Соёлын анхдугаар фестивалийг зохион байгуулах болжээ.

12.    Тэрээр 2011 онд Вашингтон хотноо ДОХ-ын эсрэг бүх нийтийн гүйлтэд өөрийн шавь нартайгаа оролцсон байдаг.  Энэ арга хэмжээнээс олсон орлого ДОХ-оор өвдөгсөд, нян тээгчдийг эмчлэхэд зарцуулагддаг аж.

13.    Ажиа гэгээн монголд ирснээсээ хойш монгол хүмүүст туслах тухай бодож эхэлжээ. Тийн бодож байх хугацаандаа хорт хавдраар өвчилсөн хүүхдүүдэд эмнэлэг барьж өгөх санааг олж ЭМЯ-ны холбогдох хүмүүстэй уулзаж эхэлсэн гэдэг.

14.    Эмнэлэг байгуулах санаагаа олчихоод тэрээр шавь нар болон найз нөхдөөсөө хандив цуглуулж эхэлсэн байна. Улмаар "Цагийг бэлгэдэгч наран чөлөө"ном, "Цогт нууцын хураангуй буюу Сандуйн жүд судар оршивой" cd-ний борлуулалтаас олсон бүх мөнгөө энэ эмнэлгийн зардалд оруулах болжээ.

15.    Анх түүний эмнэлэг хорт хавдартай хүүхдүүдэд зориулсан Яармагт баригдах ёстой эмнэлэг байсан ч дэд бүтцийн асуудлаас болж удаашрах төлөвтэй болжээ. Тиймээс тэр  Эх нялхсын эмнэлгийн дотор тусгай "Цусны эмгэг, хавдартай хүүхдийн эмнэлэг" барихаар болсон байна.

16.     Түүний байгуулах гэж буй эмнэлэг Эх Хүүхдийн Эрүүл Мэндийн Үндэсний Төвийн дэргэд баригдаж байгаа бөгөөд долоон давхар өндөр хэвтэн эмчлүүлэгчийн 50 ортой, нярайн эрчимт эмчилгээний 25 ортой, хагалгааны 2 тасагтай байх аж. Энэ эмнэлэг нь нийт 4.1 тэрбум төгрөгийн өртөгтэй.


17.    Цусны эмгэг хавдартай хүүхдийн эмнэлэгийн барилга ирэх есдүгээр сард дуусах бөгөөд үргэлжлүүлээд доторх бүх тоног төхөөрөмжийг тавьж өгөх юм байна.  Барилгын нээлтийг ирэх есдүгээр сарын 21-нд хийхээр төлөвлөжээ.

18.   Тэрээр энэ эмнэлэгийнхээ тухай нэгэн ярилцагад “Бид сүүлийн үеийн дэвшилтэт техник технологитой орчин үеийн хамгийн сайн эмнэлэг байгуулна” гэсэн байна.

19.    Түүнчлэн эмнэлгийн барилгын долдугаар давхарт монгол гэрийн хэлбэртэй бурхны өргөө байгуулж тэндээ Манал бурхан бүтээж залах гэнэ.  Энэ өргөө нь эмчлүүлэгчийг тайвшруулах, бясалгал хийх боломжийг бий болгодог гээд олон ач тустай юм байна.

20.    Тэрээр ирэх сарын 14-нд Гандантэгчинлэн болон Дашчойлон хийдэд гурав хоног Манал бурхны тарни номыг монголчуудад зориулан хурах гэж байна. Мөн ирэх сарын 21-нд эмнэлэгийн барилгын нээлтийг тохиолдуулаад “Улаанбаатар палас”-т концерт хийх гэнэ. Энэ үеэр тэрээр эрүүл мэндийн бурхан Манал бурхны номыг хурна гэжээ.

22.    Ажиа Ринбүчий хоёр жилийн өмнө Монголд Энэрэл нигүүсэл оюун билгийн төв хэмээн ТББ байгуулжээ. Уг төв боловсрол, эмнэлэг болон хүмүүнлэгийн чиглэлээр үйл ажиллагаа явуулдаг аж.

23.    Одоогоор тэр гурван төвийн үйл ажиллагааг зэрэг удирдаж байгаа бөгөөд энэ гурвын хоёр нь Төвд - Монголын  урлаг соёл, Буддын сургаалийг дэлгэрүүлэх үйл ажиллагаа явуулж байна. Мөн тэрээр Энэтхэг дэх Төвдийн дүрвэгдсэдэд  зориулж  буяны тусламжийн үйл ажиллагаа явуулдаг аж.

24.    Ажиа рэнбүүчи одоогоор гадагшаа явсан байгаа бөгөөд ирэх сарын 10-ны үеэр ирнэ.